मुस्लीम धर्मगुरूंना खासदार नुसरत जहॉंचे उत्तर

नवी दिल्ली : कोलकात्यातील चालताबागान दुर्गा पूजा मंडपात बंगाली हिंदू परंपरेचा भाग असलेल्या सिंदूर खेला मध्ये तृणमूल कॉंग्रेसच्या खासदार व प्रसिद्ध बंगाली अभिनेत्री नुसरत जहॉं या पती निखिल जैनसोबत सहभागी झाल्या होत्या. दुर्गा पूजा उत्सावात गेल्याबद्दल उलेमा-ई-हिंदचे उपाध्यक्ष मुफ्ती असद कासमी यांनी नुसरत जहॉं यांच्यावर टीका केली होती. नुसरत जहॉं यांनी आपले नाव आणि धर्म बदलून घ्यावा. त्या इस्लाम आणि मुस्लिमांची बदनामी करत आहेत असे मुफ्ती असद कासमी म्हणाले होते. त्यावर आता नुसरत जहॉं यांनी उत्तर दिले आहे. कोणत्याही वादाने मला काही फरक पडत नसल्याचे त्यांनी म्हटले आहे.

देवाची माझ्यावर विशेष कृपा असून वादांमुळे मला फरक पडत नाही असे नुसरत जहॉं यांनी स्पष्ट केले आहे. कोलकात्यात दुर्गा पूजा उत्सवात सहभागी झाल्याबद्दल उत्तर प्रदेशातील मुस्लीम धर्मगुरूंनी त्यांना लक्ष्य केले होते. देवाची माझ्यावर विशेष कृपा आहे. मी सर्व सण साजरे करते. मी मानवतेचा आदर करते. मी माझ्या आयुष्यात खूप आनंदी आहे. वादांमुळे मला फरक पडत नाहीअसे नुसरत जहॉं म्हणाल्या.

नुसरत जहॉंनी पूजा करणे अजिबात नवीन नाही. इस्लामच्या अनुयायांना फक्त अल्लाहची पूजा करण्याचे आदेश असतानाही नुसरत जहॉं हिंदू देवतांची पूजा करतात. त्यांनी जे केले ते पाप आहे असे हे धर्मगुरु म्हणाले होते. त्यांनी धर्माबाहेर लग्न केले. त्यामुळे त्यांनी त्यांचे नाव आणि धर्म बदलावा असे मुफ्ती असद कासमी म्हणाले.

देवबंदमधल्या उलेमांनी नुसरत जहॉं इस्लामविरोधी काम करत असल्याची टीका केली होती. जर नुसरत जहॉं यांना इस्लामच्या शिकवणीविरुद्ध जाणारी कामे करायची असतील तर त्यांनी प्रथम आपले नाव बदलले पाहिजे. अशा प्रकारे वागून त्या इस्लाम धर्माचा अपमान का करत आहेत, असा प्रश्न उलेमांनी विचारला होता. नुसरत यांनी यापूर्वीही पूजा केली आहे. अशाप्रकारच्या कृत्याला इस्लाम धर्मात बिलकूल परवानगी नाही, असे उलेमांचे म्हणणे होते.