प्रभात वृत्तसेवा पुणे – महापालिका निवडणुकीत सर्वाधिक इच्छुक उमेदवार असलेल्या भारतीय जनता पक्षाने उमेदवार याद्या जाहीर झाल्यानंतर बंडखोरी होण्याची शक्यता लक्षात घेऊन सोमवारी यादी जाहीर न करता थेट उमेदवारांना अर्जासोबत आवश्यक असलेला पक्षाचा अधिकृत उमेदवार म्हणून एबी फॉर्मचे वाटप करण्यात आले. पक्षाचे स्थानिक पदाधिकारी, तसेच आमदारांच्या माध्यमातून उमेदवारांना संपर्क करून मध्यरात्रीपासूनच हे फाॅर्म देऊन सकाळी तातडीने अर्ज भरण्याच्या सूचना देण्यात आल्या. यात सुमारे ९० ते १०० उमेदवारांचा समावेश आहे. त्यामुळे ज्या उमेदवारांना निरोप मिळाला, त्यांनी शक्तिप्रदर्शन करत आपले अर्ज दाखल केले. पक्षाकडून हे अर्ज देण्यात आल्यानंतर सोमवारी जवळपास २५ माजी नगरसेवकांचा पत्ता कट झाल्याचे समोर आले आहे. सुमारे दहापेक्षा अधिक उमेदवारांच्या कुटुंबातील इतर नातेवाईकांना उमेदवारी देण्यात आली आहे. शिवसेना, तसेच राष्ट्रवादीतून भाजपच्या गोटात आलेल्या माजी नगरसेवकांनाही पक्षाकडून एबी फाॅर्म देण्यात आले आहेत. पक्षाने अशा प्रकारे थेट फाॅर्म दिल्याने इच्छुकांचा चांगलाच गोंधळ उडाला, तर पत्ता कट झालेल्या माजी नगरसेवकांनी पक्षाच्या नेत्यांशी संपर्क साधण्याचा आणि त्यांची भेट घेण्याचा प्रयत्न दिवसभर केला. मात्र, त्यांना कोणताही प्रतिसाद मिळाला नाही. त्याच वेळी भाजपकडून महायुतीचे घटकपक्ष असलेल्या रिपाइं, तसेच शिवसेनेसोबत जागा वाटपाची चर्चा सुरू असलेल्या ठिकाणी अद्याप उमेदवार जाहीर केलेले नाहीत. पर्वती, हडपसर आणि वडगावशेरी विधानसभा मतदारसंघातील अनेक प्रभागांमध्ये एकाही उमेदवारास अद्याप निरोप देण्यात आलेला नाही. २०१७ मध्ये संधी यंदा घराचा रस्ता भारतीय जनता पक्षाकडून २०१७ मध्ये इतर पक्षांतून भाजपमध्ये घेतलेल्या अनेक माजी नगरसेवकांचा पत्ता कट करण्यात आला आहे. मोदी लाटेत हे नगरसेवक निवडून आले होते. मात्र, गेल्या पाच वर्षांत त्यांच्याकडून प्रभागात अपेक्षित कामे झाली नसल्याचे भाजपने केलेल्या सर्वेक्षणातून समोर आले. अनेक नगरसेवकांची कारकीर्द वादग्रस्त ठरली, अशा नगरसेवकांना पक्षाने घरचा रस्ता दाखवला असल्याचे पक्षातील सूत्रांकडून सांगण्यात आले. नाराजांची पवारांच्या बंगल्यावर रांग भाजपकडून उमेदवारी न मिळाल्याने अनेक नाराज इच्छुक, तसेच माजी नगरसेवकांनी राष्ट्रवादी काँग्रेसमधून उमेदवारी मिळविण्यासाठी उपमुख्यमंत्री अजित पवार यांच्या भोसलेनगर येथील बंगल्याच्या बाहेर रांगा लावल्या होत्या. उमेदवारीसाठी एबी फाॅर्म न मिळाल्याने, तसेच आपल्या जागेवर इतर उमेदवारांना संधी देण्यात आल्याने या नाराजांनी थेट पवारांची भेट घेतली. काही इच्छुकांनी शिवसेनेच्या पुण्यातील महायुतीच्या जागा वाटपाच्या निर्णय प्रक्रियेत असलेल्या नेत्यांशीही संपर्क साधला.
