Ajit Doval – दहशतवादाविरुद्ध निर्णायक लढ्यात दुहेरी मापदंड असू शकत नाहीत. दहशतवादाच्या आश्रयदात्यांना पाठिंबा द्यायचा की त्यांच्याविरुद्ध निर्णायक कारवाई करायची, याचा निर्णय घेणे आवश्यक आहे, अशा शब्‍दांत राष्ट्रीय सुरक्षा सल्लागार अजित डोवाल यांनी भारताची स्‍पष्‍ट भूमिका मांडली. मॉस्को येथे आयोजित पहिल्या आंतरराष्ट्रीय सुरक्षा मंच आणि सुरक्षाविषयक मुद्द्यांवरील उच्च-स्तरीय प्रतिनिधींच्या 14व्या बैठकीला ते संबोधित करत होते.

अजित डोवाल म्‍हणाले, जबाबदार राष्ट्रांनी आता एक स्पष्ट निवड करणे गरजेचे आहे. ती म्हणजे दहशतवादाला खतपाणी घालणाऱ्यांना पाठिंबा द्यायचा की एकत्र येऊन त्यांच्याविरुद्ध कठोर कारवाई करायची. दहशतवादी धोक्यांचा सामना करण्यासाठी जागतिक स्तरावर एकत्रित आणि एकजुटीने कारवाई करणे किती अनिवार्य आहे, यावर त्यांनी विशेष भर दिला.

याशिवाय दुसऱ्या महायुद्धानंतर 1945 मध्ये स्थापन करण्यात आलेल्या जागतिक संस्था आणि संरचनांमध्ये तातडीने सुधारणा करण्याची नितांत गरज असल्याचे त्‍यांनी अधोरेखित केले. आधुनिक काळातील आंतरराष्ट्रीय सुरक्षा आव्हानांचा सामना करण्यासाठी या जुन्या संस्थांना अधिक प्रभावी बनवणे अत्यंत महत्त्वाचे आहे, असा युक्तिवाद त्यांनी केला.

या सुधारणांच्या माध्यमातून विकसनशील आणि अल्पविकसित राष्ट्रांना (ज्यांचा ग्लोबल साऊथमध्ये समावेश होतो) अधिक प्रतिनिधित्व दिले गेले पाहिजे. शिवाय, त्यांच्या दृष्टिकोनाचाही प्रमुख जागतिक निर्णय-प्रक्रियांमध्ये समावेश केला जाणे अनिवार्य आहे.

तसेच पश्चिम आशियातील परिस्थितीचा संदर्भ देत डोवाल यांनी सांगितले की, हॉर्मुझची सामुद्रधुनी आणि तांबडा समुद्र यांसारख्या प्रमुख आंतरराष्ट्रीय सागरी मार्गांद्वारे होणारा व्यापाराचा प्रवाह सुरक्षित आणि निर्विघ्नपणे सुरू राहील, याची खात्री करणे हे सर्वोच्च प्राधान्याचे काम आहे.या मंचाच्या निमित्ताने 28 आणि 29 मे रोजी राष्ट्रीय सुरक्षा सल्लागार विविध राष्ट्रांच्या प्रतिनिधींसोबत द्विपक्षीय बैठकाही घेतील, अशी अपेक्षा आहे.