Nitin Patil: महामार्गालगतच्या नागरिकांचे प्रश्न तातडीने सोडवा! खा. नितीन पाटील यांची अधिकार्यांना सूचना
Nitin Patil: पुणे-सातारा महामार्गावरील अपघात आणि सर्व्हिस रोडच्या प्रश्नांवर खा. नितीन पाटील आक्रमक; एनएचएआय अधिकाऱ्यांना प्रत्यक्ष पाहणी करून प्रश्न सोडवण्याचे आदेश.
Nitin Patil – महामार्गाचा विस्तार आणि विकास होत असताना स्थानिक नागरिकांच्या दैनंदिन सुरक्षिततेकडे दुर्लक्ष करून चालणार नाही. सर्व्हिस रोडचे रखडलेले काम आणि अंडरपासच्या समस्या प्राधान्याने सुटल्या पाहिजेत अशा सूचना खा. नितीन पाटील यांनी महामार्ग प्राधिकरणाच्या वरिष्ठ अधिकार्यांसोबत आज झालेल्या आढावा बैठकीत दिल्या. पुणे-सातारा तसेच शिरवळ-लोणंद महामार्गालगतच्या नागरिकांना भेडसावणार्या गंभीर समस्या,
वाहतूक कोंडी आणि रस्ते सुरक्षेशी संबंधित प्रलंबित प्रश्नांवर आज खासदार नितीन पाटील यांच्या अध्यक्षतेखाली राष्ट्रीय महामार्ग प्राधिकरणाच्या वरिष्ठ अधिकार्यांसोबत आढावा बैठक पार पडली. या बैठकीत शिरवळ, खंडाळा, वेळे, सुरूर, भुईंज, उडतारे यांसारख्या महामार्गालगतच्या गावांमधील स्थानिक नागरिक, शेतकरी आणि लोकप्रतिनिधींनी उत्स्फूर्तपणे सहभाग नोंदवला. स्थानिक नागरिकांनी सर्व्हिस रोडची दुरवस्था, अंडरपास आणि उड्डाणपुलांची आवश्यकता,
अपुरे पथदिवे, पाणी साचण्याच्या समस्या आणि धोकादायक वळणांमुळे होणारे अपघात यांसारख्या प्रमुख अडचणी स्थानिकांनी अधिकार्यांच्या निदर्शनास आणून दिल्या. नागरिकांच्या मागण्या आणि व्यथा ऐकून घेतल्यानंतर खा. नितीन पाटील यांनी संबंंधित अधिकार्यांना तात्काळ घटनास्थळी पाहणी करून ठोस उपाययोजना करण्याचे निर्देश दिले. या महत्त्वपूर्ण बैठकीस प्रोजेक्ट मॅनेजर सचिन गौतम, श्री. पाटील यांच्यासह प्राधिकरणाचा संपूर्ण अधिकारी वर्ग, बकाजीराव पाटील, जि. प.चे माजी अध्यक्ष उदय कबुले, अशोक धायगुडे, सुजित जाधवराव यांच्यासह परिसरातील अनेक मान्यवर व नागरिक उपस्थित होते.
नागरिकांच्या सुरक्षिततेला सर्वोच्च प्राधान्य
महामार्गावरील आधुनिक सुविधांसोबतच लगतच्या गावकर्यांचा प्रवास सुखरूप आणि त्रासमुक्त कसा होईल, यावर प्रशासनाने भर दिला पाहिजे. नागरिकांच्या प्रत्येक वाजवी मागणीवर प्रशासनाकडून सकारात्मक निर्णय होईपर्यंत सातत्याने पाठपुरावा केला जाईल, असे आश्वासन खा. नितीन पाटील यांनी यावेळी दिले.
