सिंधुदुर्ग – शिवसैनिक संतोष परब यांच्यावरील हल्ल्याप्रकरणी भाजप आमदार नितेश राणे यांची आज सलग चार तास चौकशी करण्यात आली. तसेच पोलिसांनी नितेश राणे आणि त्यांच्या स्वीय साहाय्यक राकेश परबची समोरासमोर बसूनही चौकशी केली.

नितेश राणे यांचा मोबाईल फोन आणि मुख्य आरोपी सचिन सातपुतेला केलेल्या फोनबाबत चौकशी करण्यात आली. या चौकशीनंतर सिंधुदुर्ग पोलीस नितेश राणेंना घेऊन गोव्याला गेले. याप्रकरणी पुरावे जमा करण्याची आणि खातरजमा करण्याचे काम पोलिसांकडून सुरु आहे.

नितेश राणे यांची दोन टप्प्यांमध्ये चौकशी झाली. आधी नितेश राणे आणि राकेश परब या दोघांची समोरासमोर बसून चौकशी केली गेली. राकेश परबच्या मोबाईलमधून या प्रकरणातील गुन्हेगारांवर कितीवेळा फोन केला गेला याबाबत चौकशी केली गेली.

या चौकशीदरम्यान कणकवली पोलीस राकेश परबला घेऊन कुठेतरी दुसरीकडे घेऊन गेले होते. त्यानंतर थोड्या वेळाने त्याला पुन्हा कणकवली पोलीस ठाण्यात आणण्यात आले. त्याची पुन्हा चौकशी केली गेली, अशी दोन टप्प्यात नितेश राणे आणि राकेश परब यांच्यात चौकशी केली गेली. चार तासांपैकी दोन तास नितेश राणे यांची एकांतात वैयक्तिक चौकशी केली गेली.

नितेश राणेंची चौकशी पूर्ण झाल्यानंतर सिंधुदुर्ग पोलीस राणेंना घेऊन दुपारी साडेतीनच्या सुमारास गोव्याच्या दिशेला गेले. गोव्यातील काही ठिकाणी नितेश राणे राहिले होते. विशेषत: ज्यावेळी पोलीस नितेश राणेंना शोधत होते त्यावेळी ते गोव्यात काही ठिकाणी राहिले होते. त्याचबरोबर हल्ल्याच्याआधी गोव्यात मिटिंग झाली होती, असा सुगावा कणकवली पोलिसांना लागलेला आहे. त्यासाठीच कणकवली पोलीस तपास करत आहेत. त्यामुळे ज्याठिकाणी हल्ल्याचा कट रचला गेला तिथे काही पुरावे मिळतात का याचा प्रयत्न पोलीस घेत आहेत.