Nirmala Nawale : राष्ट्रवादी काँग्रेसच्या युवती आघाडीच्या नेतृत्वात महत्त्वाचा बदल करण्यात आला असून, पुणे जिल्ह्यातील शिरूर तालुक्यातील कारेगावच्या माजी सरपंच निर्मला शुभम नवले यांची राष्ट्रवादी युवती काँग्रेसच्या प्रदेशाध्यक्षपदी नियुक्ती करण्यात आली आहे.

विद्यमान प्रदेशाध्यक्षा संध्या सोनवणे यांच्या जागी आता नवले यांच्याकडे राज्यातील युवती संघटनेची धुरा सोपवण्यात आली आहे.

मुंबईतील देवगिरी या शासकीय निवासस्थानी आयोजित कार्यक्रमात राष्ट्रवादी काँग्रेसच्या अध्यक्षा आणि राज्याच्या उपमुख्यमंत्री सुनेत्रा पवार यांच्या हस्ते निर्मला नवले यांना नियुक्तीचे अधिकृत पत्र प्रदान करण्यात आले.

ग्रामीण नेतृत्वातून राज्याच्या राजकारणात झेप –

निर्मला नवले यांनी शिरूर तालुक्यातील औद्योगिकदृष्ट्या महत्त्वाचे कारेगावच्या सरपंच म्हणून काम केले. ग्रामीण भागातील महिला आणि तरुणांना संघटित करण्यासाठी प्रयत्न केले. त्यांच्या कार्याची दखल घेत पक्षाने त्यांच्यावर प्रदेशाध्यक्षपदाची जबाबदारी सोपवली आहे.

पक्षाच्या वरिष्ठ नेतृत्वाने या नियुक्तीमुळे राज्यातील युवती संघटना अधिक मजबूत होईल आणि तरुणींच्या विविध प्रश्नांना अधिक प्रभावीपणे वाचा फोडली जाईल, असा विश्वास व्यक्त केला आहे.

कोण आहेत निर्मला नवले?

निर्मला शुभम नवले यांनी 2021 मध्ये अवघ्या 27 व्या वर्षी सार्वजनिक जीवनात प्रवेश केला. त्या आयटी शाखेतील बी.ई. (IT) पदवीधर आहेत. नवले यांनी कारेगावच्या सरपंचपदापासून राजकीय प्रवासाची सुरुवात केली.

कार्याध्यक्षपदापासून प्रदेशाध्यक्षपदापर्यंतचा प्रवास –

दिवंगत नेते अजित पवार यांनी निर्मला नवले यांच्यावर राष्ट्रवादी युवती काँग्रेसच्या प्रदेश कार्याध्यक्षपदाची जबाबदारी सोपवली होती. त्या पदावर काम करताना त्यांनी राज्यभरातील युवतींशी संवाद साधत संघटन विस्तारासाठी काम केले.

आता प्रदेशाध्यक्ष म्हणून त्यांच्याकडे संपूर्ण महाराष्ट्रातील युवतींचे संघटन अधिक सक्षम करणे, नव्या महिला नेतृत्वाला संधी उपलब्ध करून देणे आणि पक्षाची ताकद वाढवण्याची जबाबदारी असेल.

या मुद्द्यांवर राहणार विशेष भर –

प्रदेशाध्यक्षपदाची जबाबदारी स्वीकारल्यानंतर निर्मला नवले यांनी शिक्षण, रोजगार, महिलांची सुरक्षितता, सायबर छळाविरोधातील जनजागृती, आरोग्य, स्वावलंबन आणि तरुणींचे राजकीय प्रतिनिधित्व या विषयांवर विशेष लक्ष केंद्रित करण्याचा मानस व्यक्त केला आहे.

तसेच सुशिक्षित आणि कर्तृत्ववान युवतींना पक्षाच्या मुख्य प्रवाहात आणून त्यांच्या प्रश्नांसाठी प्रभावी व्यासपीठ उभे करण्याचे ध्येय त्यांनी व्यक्त केले आहे.