Senior Citizen Savings Scheme: वाढत्या महागाईच्या काळात निवृत्तीनंतर नियमित आणि सुरक्षित उत्पन्न ही ज्येष्ठ नागरिकांची सर्वात मोठी गरज बनली आहे. शेअर बाजार आणि म्युच्युअल फंडातील चढ-उतारांच्या जोखमीमुळे आजही सर्वसामान्यांचा ओढा पोस्टाच्या सरकारी योजनांकडे अधिक आहे. पोस्ट ऑफिसची ‘सीनियर सिटीजन सेविंग स्कीम’ (SCSS) अशा लोकांसाठी वरदान ठरत असून, यातून दरमहा १७,००० रुपयांपेक्षा जास्त खात्रीशीर कमाई करण्याची संधी उपलब्ध झाली आहे. का खास आहे ही योजना? पोस्ट ऑफिसच्या योजनांना केंद्र सरकारची हमी असल्याने यात गुंतवणुकीची सुरक्षा १०० टक्के असते. सध्या या योजनेवर ८.२ टक्के आकर्षक व्याजदर मिळत आहे, जो अनेक बँकांच्या मुदत ठेवींपेक्षा (FD) जास्त आहे. विशेष म्हणजे, एकदा गुंतवणूक केल्यानंतर संपूर्ण मॅच्युरिटी कालावधीपर्यंत तोच व्याजदर लागू राहतो. गुंतवणुकीची मर्यादा आणि व्याप्ती तुम्ही केवळ १,००० रुपयांपासून या योजनेत सुरुवात करू शकता. जास्तीत जास्त ३० लाख रुपयांपर्यंत गुंतवणूक करण्याची मुभा आहे. ६० वर्षे किंवा त्यापेक्षा जास्त वयाची व्यक्ती हे खाते उघडू शकते. ज्यांनी ‘VRS’ घेतली आहे अशा ५५ ते ६० वयोगटातील व्यक्तींना आणि निवृत्त संरक्षण कर्मचाऱ्यांना ५० ते ६० वयोगटातही यात गुंतवणूक करता येते. post office scheme कर सवलतीचा दुहेरी लाभ – SCSS ही योजना केवळ उत्पन्नाचे साधन नसून करात सवलत मिळवून देणारीही आहे. ‘आयकर कायदा कलम ८०-सी’ (Section 80C) अंतर्गत यातील गुंतवणुकीवर वार्षिक १.५ लाख रुपयांपर्यंत टॅक्स सूट मिळते. यामुळे गुंतवणुकीवर कमाई तर होतेच, शिवाय कराचा बोजाही कमी होतो. दरमहा १७,००० रुपये कसे मिळतील? या योजनेचे गणित अत्यंत सोपे आहे. जर एखाद्या गुंतवणूकदाराने २५ लाख रुपये या योजनेत गुंतवले, तर ८.२% व्याजदराने त्यांना वर्षाकाठी २.०५ लाख रुपये व्याज मिळेल. त्रैमासिक उत्पन्न साधारण ५१,२५० रुपये. मासिक उत्पन्न प्रति महिना सुमारे १७,०८३ रुपये. मॅच्युरिटी आणि इतर नियम – या योजनेचा कालावधी ५ वर्षांचा आहे, जो इच्छेनुसार पुढे ३ वर्षांसाठी वाढवता येतो. व्याजाचे पेमेंट दर तीन महिन्यांनी केले जाते. मुदतीपूर्वी खाते बंद केल्यास काही दंड आकारला जातो, तर खातेदाराचा मृत्यू झाल्यास सर्व जमा रक्कम वारसाला (Nominee) दिली जाते. हेही वाचा – Todays Top 10 News: ZP निवडणूकीत भाजपच मोठा पक्ष ते शरद पवार रुग्णालयात दाखल, वाचा आजच्या टाॅप बातम्या
