Ram Mandir Donation Case: राम मंदिरातील कोट्यवधी रुपयांच्या देणगी घोटाळ्याप्रकरणी मोठी घडामोड समोर आली असून, श्री राम जन्मभूमी तीर्थ क्षेत्र ट्रस्टचे सदस्य चंपत राय आणि अनिल मिश्रा यांनी आपल्या पदांचा राजीनामा दिला आहे. विशेष तपास पथकाच्या (एसआयटी) प्राथमिक अहवालातील गंभीर शिफारशींनंतर हा निर्णय घेण्यात आल्याची माहिती सूत्रांनी दिली आहे.

या प्रकरणाच्या चौकशीसाठी स्थापन करण्यात आलेल्या एसआयटीने सादर केलेल्या प्राथमिक अहवालानंतर तपासाला वेग आला असून, त्याआधारे पहिला एफआयआरही दाखल करण्यात आला आहे. चंपत राय आणि अनिल मिश्रा यांच्या राजीनाम्याचा संबंध या तपासाशी जोडला जात असल्याने प्रकरणाला नवे वळण मिळाले आहे.  (Ram Mandir Donation Case)

सध्या एसआयटीकडून कथित आर्थिक गैरव्यवहाराची सखोल चौकशी सुरू असून, आरोपींची बँक खाती, मालमत्ता, मोबाईल रेकॉर्ड तसेच संशयित आर्थिक व्यवहारांची छाननी केली जात आहे. प्राथमिक अहवालात काही महत्त्वपूर्ण शिफारशी करण्यात आल्याचे सांगितले जात असून, त्यानुसार पुढील काळात आणखी कारवाई होण्याची शक्यता आहे. 200 कोटी रुपयांपर्यंत या घोटाळ्याची शक्यता असल्याचे समोर येत आहे.  (Ram Mandir Donation Case)

 

आठ जणांविरोधात गुन्हा –   (Ram Mandir Donation Case)

श्री राम जन्मभूमी तीर्थ क्षेत्र ट्रस्टचे विश्वस्त कृष्ण मोहन यांच्या तक्रारीवरून राम जन्मभूमी पोलीस ठाण्यात आठ जणांविरुद्ध गुन्हा दाखल करण्यात आला आहे. राम शंकर यादव उर्फ टिनू, अनुकल्प मिश्रा, लवकुश मिश्रा, करुणेश पांडे, अविनाश शुक्ला, मनीष यादव, राम शंकर मिश्रा आणि सुभाष चंद्र श्रीवास्तव यांचा आरोपींमध्ये समावेश आहे.

या सर्वांविरोधात अपहार, फसवणूक आणि गुन्हेगारी कट रचल्याप्रकरणी विविध कलमांखाली गुन्हा नोंदविण्यात आला आहे. सूत्रांच्या माहितीनुसार, एसआयटीचा प्राथमिक अहवाल अतिरिक्त मुख्य सचिव (गृह) यांच्याकडे सादर झाल्यानंतर ही कारवाई करण्यात आली. पोलिसांनी आतापर्यंत चार आरोपींना अटक केली असून उर्वरित आरोपींचा शोध सुरू आहे.

कृष्ण मोहन यांनी दाखल केली तक्रार –  (Ram Mandir Donation Case)

या संपूर्ण प्रकरणाची तक्रार कृष्ण मोहन यांनी दाखल केली आहे. सप्टेंबर २०२५ मध्ये त्यांची श्री राम जन्मभूमी तीर्थ क्षेत्र ट्रस्टच्या सदस्यपदी नियुक्ती करण्यात आली होती. फेब्रुवारी २०२५ मध्ये विश्वस्त कामेश्वर चौपाल यांच्या निधनानंतर रिक्त झालेल्या जागेवर त्यांची निवड झाली होती.

हरदोई येथील रहिवासी असलेल्या कृष्ण मोहन यांनी लखनौ विद्यापीठातून एमएससीची पदवी घेतली आहे. त्यांनी अणुऊर्जा क्षेत्रात सुमारे सहा वर्षे सेवा बजावल्यानंतर भारतीय वन सेवेत (आयएफएस) प्रवेश केला. महाराष्ट्र केडरमध्ये दीर्घकाळ सेवा बजावून २०१२ मध्ये निवृत्त झाल्यानंतर ते सामाजिक कार्यात सक्रिय झाले.

दरम्यान, एसआयटीच्या अंतिम अहवालात आणखी धक्कादायक खुलासे होण्याची शक्यता वर्तविली जात असून, ट्रस्टच्या कामकाजातही काही महत्त्वपूर्ण बदल होण्याची शक्यता नाकारता येत नाही.