Omraje Nimbalkar : विकासकामांसाठी पुरेसा निधी मिळत नसल्याचे कारण देत शिवसेना (उद्धव बाळासाहेब ठाकरे) पक्षातील सहा खासदारांनी काल उपमुख्यमंत्री एकनाथ शिंदे यांच्या शिवसेनेत प्रवेश केला.

या पार्श्वभूमीवर संबंधित खासदारांच्या खात्यात खासदार स्थानिक क्षेत्र विकास निधी (एमपीएलएडी) योजनेचे कोट्यवधी रुपये शिल्लक असल्याची आकडेवारी समोर आल्यानंतर विरोधकांकडून टीकेची झोड उठली आहे. या आरोपांना धाराशिवचे खासदार ओमराजे निंबाळकर यांनी पत्रकार परिषदेत सविस्तर आकडेवारीसह उत्तर देत विरोधकांचे दावे फेटाळून लावले.

“माझ्या २०१९ ते २०२४ या पहिल्या कार्यकाळातील खासदार निधीतील एकही रुपया अखर्चित राहिलेला नाही. सध्याच्या कार्यकाळाचे मूल्यमापन २०२९ मध्ये करावे,” असे स्पष्ट करत निंबाळकर यांनी विरोधकांवर निशाणा साधला.   (Omraje Nimbalkar)

निंबाळकर म्हणाले, खासदार निधी हा पाच वर्षांच्या कालावधीसाठी दिला जातो. त्यामुळे चालू कार्यकाळ संपण्यापूर्वी निधीबाबत निष्कर्ष काढणे चुकीचे आहे. “माझ्या पहिल्या कार्यकाळात मिळालेल्या निधीचा शंभर टक्के वापर करण्यात आला असून, याची माहिती एमपीएलएडीच्या अधिकृत संकेतस्थळावर उपलब्ध आहे,” असे त्यांनी सांगितले.

 

अधिकृत आकडेवारीनुसार, निंबाळकर यांच्या खात्यात १८ कोटी रुपयांचा निधी दाखविण्यात आला आहे. याबाबत स्पष्टीकरण देताना त्यांनी सांगितले की, “प्रत्यक्षात तीन वर्षांसाठी १५ कोटी रुपये मिळणे अपेक्षित होते. मात्र, माझ्यापूर्वीच्या खासदारांनी खर्च न केलेला सुमारे तीन कोटी रुपयांचा निधी माझ्या खात्यात वर्ग झाल्याने एकूण रक्कम १८ कोटी रुपये दिसत आहे.”   (Omraje Nimbalkar)

खासदार निधीच्या मर्यादा स्पष्ट करताना निंबाळकर यांनी मतदारसंघातील मतदान केंद्रांच्या संख्येचे उदाहरण दिले. “धाराशिव लोकसभा मतदारसंघात सुमारे २,४७५ मतदान केंद्रे आहेत. पाच वर्षांत मिळणारे २५ कोटी रुपये सर्व बूथमध्ये समान वाटल्यास प्रत्येक बूथसाठी अवघा एक लाख रुपये निधी उपलब्ध होतो. सध्याच्या परिस्थितीत एवढ्या रकमेत कोणतेही मोठे विकासकाम उभारणे शक्य नाही,” असे ते म्हणाले.   (Omraje Nimbalkar)

एखाद्या गावासाठी सात ते दहा लाख रुपयांचा निधी दिल्यास इतर अनेक गावांना निधीपासून वंचित राहावे लागते. त्यामुळे केवळ खासदार निधीच्या माध्यमातून संपूर्ण मतदारसंघाचा विकास शक्य नसून, राज्याच्या सत्तेत राहून अतिरिक्त निधी खेचून आणणे आवश्यक असते, असेही निंबाळकर यांनी स्पष्ट केले.  (Omraje Nimbalkar)

खासदार निधी खर्च न केल्याच्या आरोपांवर निंबाळकर यांनी आकडेवारीच्या आधारे सविस्तर स्पष्टीकरण दिल्याने या मुद्यावर आता विरोधक काय भूमिका घेतात, याकडे राजकीय वर्तुळाचे लक्ष लागले आहे.