MP Bhausaheb Wakchaure : शिर्डी राखीव लोकसभा मतदारसंघाचे शिवसेना (उद्धव बाळासाहेब ठाकरे) पक्षाचे खासदार भाऊसाहेब वाकचौरे यांच्या संभाव्य पक्षांतराच्या चर्चेमुळे जिल्ह्यातील राजकीय वातावरण पुन्हा एकदा ढवळून निघाले आहे. वाकचौरे हे उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याच्या चर्चांनी राजकीय वर्तुळात वेग घेतला असून, त्यामुळे मतदारसंघातील राजकीय घडामोडींना नवे वळण मिळण्याची शक्यता व्यक्त केली जात आहे.

शिर्डी लोकसभा मतदारसंघात खासदार भाऊसाहेब वाकचौरे आणि माजी खासदार सदाशिव लोखंडे हे दोघेही विविध राजकीय घडामोडींमुळे सातत्याने चर्चेत राहिले आहेत. विशेषतः पक्षांतर आणि बदलत्या राजकीय समीकरणांमुळे या मतदारसंघाने राज्याच्या राजकारणात वेगळी ओळख निर्माण केली आहे.

प्रशासकीय सेवेतून निवृत्त झाल्यानंतर भाऊसाहेब वाकचौरे यांनी २००९ मध्ये तत्कालीन शिवसेनेच्या उमेदवारीवर लोकसभेत प्रवेश केला. त्यानंतर २०१४ च्या निवडणुकीपूर्वी त्यांनी काँग्रेसमध्ये प्रवेश केला; मात्र या निवडणुकीत त्यांना पराभवाला सामोरे जावे लागले. त्यानंतरच्या राजकीय घडामोडींमध्ये त्यांनी विविध पक्षांशी जवळीक साधल्याने त्यांच्या राजकीय भूमिकांबाबत सातत्याने चर्चा होत राहिली.

दुसरीकडे, माजी खासदार सदाशिव लोखंडे यांनीही या मतदारसंघात सलग दोन वेळा प्रतिनिधित्व केले. मात्र, मागील लोकसभा निवडणुकीत मतदारांनी बदलाला पसंती दिल्याने त्यांना पराभव स्वीकारावा लागला. त्यामुळे शिर्डी मतदारसंघातील जनमत वेळोवेळी बदलत्या राजकीय परिस्थितीनुसार व्यक्त होत असल्याचे दिसून आले आहे.

सध्या खासदार वाकचौरे यांच्या संभाव्य पक्षप्रवेशाच्या चर्चेमुळे पुन्हा एकदा मतदारसंघात राजकीय चर्चा रंगू लागल्या आहेत. विकासकामांसाठी सत्ताधारी पक्षाशी जवळीक साधण्याचा प्रयत्न असल्याचे समर्थकांकडून सांगितले जात असले, तरी वारंवार होणाऱ्या पक्षबदलांकडे मतदार कशा नजरेने पाहतील, याबाबत राजकीय वर्तुळात उत्सुकता आहे.

आगामी काळात खासदार वाकचौरे यांच्या निर्णयाचा मतदारसंघातील राजकीय समीकरणांवर काय परिणाम होतो आणि मतदार त्याला कितपत स्वीकारतात, हे येणारा काळच स्पष्ट करणार आहे.

पक्षांतराची चर्चा; मतदारांची भूमिका निर्णायक –

देशात आणि राज्यात सत्ताधारी पक्षाशी सुसंगत राहिल्यास मतदारसंघाच्या विकासासाठी अधिक निधी मिळू शकतो, असा दावा समर्थकांकडून केला जात आहे. मात्र, वारंवार पक्षांतर करणाऱ्या नेत्यांबाबत मतदारांची भूमिका काय असेल, याकडे सर्वांचे लक्ष लागले आहे. आगामी निवडणुकांमध्ये मतदार यावर अंतिम शिक्कामोर्तब करतील, अशी चर्चा राजकीय वर्तुळात सुरू आहे.