Raj Thackeray :  ना आमदार, ना खासदार आणि मुंबई महापालिकेत हाताच्या बोटावर मोजण्याइतके नगरसेवक असतानाही महाराष्ट्र नवनिर्माण सेनेचे अध्यक्ष राज ठाकरे यांच्या भूमिकेचे राज्यभर पडसाद उमटतात. जाहीर सभांमधून ते केंद्र आणि राज्य सरकारवर टीका करताना विविध महत्त्वाचे मुद्दे उपस्थित करतात. जेन झीच्या आंदोलनालाही त्यांनी पाठिंबा दर्शवला होता. नव्या पिढीच्या समस्या सरकारने समजून घेऊन त्यावर निर्णय घेतले पाहिजेत, अशी भूमिका त्यांनी वेळोवेळी मांडली आहे.

राज ठाकरे हे पक्षातील पदाधिकाऱ्यांना संबोधित करत असतात. आता ठाण्यात मनसेच्या पदाधिकाऱ्यांचा मेळावा आयोजित करण्यात आला आहे. ६ सप्टेंबर रोजी ठाण्यातील गडकरी रंगायतन येथे हा मेळावा पार पडणार आहे. या मेळाव्यात राज ठाकरे काय बोलणार, याकडे राजकीय वर्तुळाचे लक्ष लागले आहे.

मनसेने आपल्या एक्स अकाऊंटवरून या मेळाव्याची घोषणा केली असून, त्यासोबत एक व्हिडिओही शेअर केला आहे. या व्हिडिओच्या माध्यमातून राज्यातील महत्त्वाच्या विषयांकडे लक्ष वेधण्यात आले आहे.

“आजची तरुणाई नेमकी काय शोधतेय? नोकरी? संधी? स्वातंत्र्य की नवी ओळख? एका नव्या पिढीचे नवे प्रश्न… राज ठाकरे काय बोलणार?” असा सवाल या घोषणेत करण्यात आला आहे. त्यामुळे मेळाव्यात राज ठाकरे तरुणाईच्या प्रश्नांसह राज्यातील विविध विषयांवर सविस्तरपणे बोलणार आहेत.

पुण्यातील घटनेवर राज ठाकरे बोलणार?

राज ठाकरे विविध मुद्द्यांवर भाष्य करणार असून, पक्षातील पदाधिकाऱ्यांना मार्गदर्शनही करणार आहेत. मात्र, पुण्यात पंतप्रधान नरेंद्र मोदी यांच्या फोटोवरून मनसे आणि भाजपच्या कार्यकर्त्यांमध्ये झालेल्या वादावर ते बोलणार का, असा प्रश्न विचारला जात आहे.

महाराष्ट्र नवनिर्माण सेना
पदाधिकारी मेळावा..!

रविवार, ६ सप्टेंबर २०२६
गडकरी रंगायतन, ठाणे#MNSAdhikrut #MNVSAdhikrut #RajThackeray #AmitThackeray #Thane pic.twitter.com/su9nEPv86Y

— MNS Adhikrut – मनसे अधिकृत (@mnsadhikrut) September 4, 2026

मनसेचे युवा नेते अमित ठाकरे पुणे दौऱ्यावर असताना शासकीय अभियांत्रिकी महाविद्यालयातील प्राचार्यांच्या केबिनमध्ये छत्रपती शिवाजी महाराज यांच्या शेजारी लावण्यात आलेला पंतप्रधान नरेंद्र मोदी यांचा फोटो हटवण्यात आला होता. त्यानंतर भाजप आणि मनसेच्या कार्यकर्त्यांमध्ये जोरदार वाद झाला. या पार्श्वभूमीवर ठाण्यातील मेळाव्यात राज ठाकरे या घटनेवर काही भूमिका मांडणार का, याकडेही राजकीय वर्तुळाचे लक्ष लागले आहे.

Mirzapur The Movie Box Office Day 1: कालीन भैया अन् गुड्डू पंडितची पुन्हा दहशत! ‘मिर्झापूर’ने पहिल्याच दिवशी कमावले कोट्यवधी