Jagdeep Dhankhar: हृदयविकाराचा झटका आल्याने दिल्ली एम्समध्ये दाखल झालेले उपराष्ट्रपती जगदीप धनखड यांच्या प्रकृतीत सुधारणा होत आहे. मात्र तरीही त्यांना काही दिवस एम्समध्येच उपचार घ्यावे लागणार आहेत. त्यांच्या प्रकृतीत समाधानकारक सुधारणा होत असल्याचे एम्स प्रशासनाने सांगितले असून त्यांची प्रकृती स्थिर आहे.

शनिवारी रात्री छातीत दुखत असल्याच्या कारणामुळे त्यांना एम्समध्ये दाखल करण्यात आले होते. त्यांची अँजिओप्लास्टी करण्यात आली. यानंतर त्यांना एम्सच्या कार्डियाक सेंटरच्या CCU (कोरोनरी केअर युनिट) मध्ये दाखल करण्यात आले आहे. तेथे त्यांच्यावर हृदयरोग तज्ज्ञ डॉक्टरांच्या देखरेखीखाली उपचार सुरू आहेत.

दरम्यान, उपराष्ट्रपती जगदीप धनखर यांच्या प्रकृतीची विचारपूस करण्यासाठी पंतप्रधान नरेंद्र मोदीही एम्समध्ये पोहोचले होते. तसेच भाजपचे ज्येष्ठ नेते आणि केंद्रीय आरोग्य मंत्री जेपी नड्डा यांनीही एम्समध्ये जाऊन धनखर यांच्या प्रकृतीची विचारपूस केली. तसेच तेथील डॉक्टरांना योग्य आरोग्य सेवा देण्याच्या सूचना दिल्या. हृदयरोग विभागाचे प्रमुख डॉ.राजीव नारंग यांच्या देखरेखीखाली त्यांच्यावर उपचार सुरू आहेत. सध्या त्यांची प्रकृती स्थिर असल्याचे सांगण्यात येत आहे.