Nepal Floods Death – नेपाळमध्ये गेल्या महिन्यात आलेल्या विनाशकारी महापुरामुळे मृतांचा आकडा रविवारी १,४५० च्या पार गेला. पूर आलेल्या भागांमध्ये सुरू असलेल्या शोधमोहिमेदरम्यान आणखी काही मृतदेह सापडल्यामुळे मृतांचा आकडा १,४५१ इतका झाल्याचे पोलिसांनी सांगितले.

या पुरामुळे चीनच्या बाजूलाही ४३ लो कांचा मृत्यू झाला असून, ५०० हून अधिक लोक अद्याप बेपत्ता आहेत, असे चिनी प्रसार माध्यमांनी म्हटले आहे.

नेपाळच्या चितवन जिल्ह्यातून ३६७ मृतदेह सापडले असून, त्यापैकी २३६ मृतदेह रसुवा येथून, २३२ नवलपरासी पूर्व येथून आणि २२२ नवलपरासी पश्चिम येथून सापडले, असे पोलिसांच्या निवेदनात म्हटले आहे.

त्याचप्रमाणे, नुवाकोटमधून २०३, गोरखामधून ७९, धादिंगमधून ७२ आणि तनहूमधून ३८ मृतदेह बाहेर काढण्यात आले, असे सांगण्यात आले. काठमांडू येथील रुग्णालयांमध्ये उपचारादरम्यान दोन पूरग्रस्तांचा मृत्यूही झाला.

आतापर्यंत देशभरातून पूरग्रस्त १३,७८४ लोकांना वाचवण्यात आले आहे. पुरानंतर सुमारे ६,००० लोक अद्याप बेपत्ता आहेत, असा अंदाज नेपाळ पोलिसांनी वर्तवला आहे.

नेपाळमध्ये बेपत्ता झालेल्यांचा शोध रसुवा आणि शेजारील जिल्ह्यांमधील नदीकिनारी, ढिगाऱ्यांच्या प्रदेशात आणि नुकसान झालेल्या जलविद्युत प्रकल्पांमध्ये सुरू आहे.

भीषण महापुराला आता महिना होत आला असला, तरी या पुराच्या परिणामातून नेपाळ अजून सावरत आहे. या पुरामुळे पूर आलेल्या भागातील रस्ते आणि पुलांचे प्रचंड नुकसान झाले आहे.

मृतदेहांची ओळख पटवणे अवघड…

मृतदेहांची ओळख पटवणे हे देखील एक मोठे आव्हान बनले आहे, आतापर्यंत सापडलेल्या एकूण मृतदेहांपैकी केवळ ११० मृतदेहांची ओळख पटल्यानंतर ते कुटुंबीयांच्या ताब्यात देण्यात आले आहेत. प्रवाहाबरोबर वाहून गेल्यानंतर सापडलेले मृतदेह गंभीरपणे खराब झालेले, कुजलेले किंवा केवळ तुकड्यांमध्येच सापडलेले आहेत.

त्यामुळे चेहरा, कपडे किंवा वैयक्तिक वस्तूंवरून ओळख पटवणे कठीण होते. अशावेळी केवळ डीएनए तपासणीद्वारेच या मृतदेहांची ओळख पटवली जाते आहे. आतापर्यंत जवळपास १,३०० मृतदेहांचे डीएनए नमुने घेतल्यानंतर त्यांना तात्पुरते दफन करण्यात आले आहे, असे अधिकाऱ्यांनी सांगितले.