Rahul Gandhi | Devendra Fadnavis – काँग्रेस नेते राहुल गांधी यांनी पक्ष सोडून स्टँड-अप कॉमेडियन बनावे, असे टीका करताना मुख्यमंत्री देवेंद्र फडणवीस यांनी रविवारी म्हटले.

इंदूरमधील छात्रों की गूंज या कार्यक्रमात राहुल गांधी यांनी पंतप्रधान नरेंद्र मोदी यांची खिल्ली उडवल्याच्या आरोपांबाबत विचारले असता फडणवीस म्हणाले, राहुल गांधी ज्या प्रकारे नक्कल करत आहेत, ते पाहता मला वाटते की त्यांनी पक्ष सोडून स्टँड-अप कॉमेडियन बनावे.

राहुल यांच्यामुळे काँग्रेस पक्षच बेरोजगार झाला आहे, त्यामुळे त्यांनी विनोदी कलाकार होण्याचा निर्णय घेतल्यास त्यांना किमान काहीतरी काम तरी मिळेल, असे फडणवीस म्हणाले.

तसेच, काही लोक विशिष्ट यूपीआय व्यवहारांवर शुल्क आकारण्याबाबत एक विशिष्ट जनमत तयार करण्याचा प्रयत्न करत आहेत.
सरकारने सुधारित मर्चंट डिस्काउंट रेट मागे न घेतल्यास, १५ ऑक्टोबरपासून २,००० रुपयांवरील यूपीआय पेमेंट स्वीकारणे बंद करण्याची धमकी मुंबईतील पेट्रोल पंप चालकांनी दिली आहे.

याबद्दल विचारले असता ते म्हणाले की, अशी भूमिका घेणे अयोग्य आहे कारण यूपीआयमुळे त्यांचा व्यवसाय वाढला आहे. त्यांचे व्यवहार पारदर्शक झाले आहेत आणि लोकही मोठ्या प्रमाणावर यूपीआयचा वापर करत आहेत. त्यावर अगदी नाममात्र शुल्क आकारले गेले आहे.

ज्या संसदीय समितीने एमडीआर लागू करण्याची शिफारस केली होती, त्यात माजी अर्थमंत्री पी. चिदंबरम आणि इतर तीन वरिष्ठ काँग्रेस नेत्यांचा समावेश होता. सरकारने स्पष्ट केले आहे की, हे शुल्क सर्व व्यवहारांवर नाही, तर केवळ विशिष्ट व्यवहारांवर लागू होते. तरीही एक विशिष्ट जनमत तयार करण्याचा प्रयत्न केला जात आहे.

भ्रष्टाचार कमी करण्यात यूपीआय व डिजिटल व्यवहारांची भूमिका प्रत्येकाने समजून घेतली पाहिजे. खर्चाचा भार उचलण्यासाठी अगदी नाममात्र रक्कम आकारण्याचा निर्णय वाजवी आहे आणि पेट्रोल पंप मालक व व्यापाऱ्यांनी ते भरण्यास विरोध करू नये, असेही त्यांनी नमूद केले.