NEET Paper Leak Case : देशभरात खळबळ उडवणाऱ्या NEET पेपरफुटी प्रकरणाचे धागेदोरे आता थेट महाराष्ट्रापर्यंत पोहोचले आहेत. या प्रकरणात नाशिकमधील संशयित शुभम खैरनारला CBI ने ताब्यात घेतलं असून, त्याची प्राथमिक चौकशी केल्यानंतर मध्यरात्री मुंबईकडे रवाना करण्यात आलं. या तपासातून अनेक धक्कादायक खुलासे समोर येत आहेत. मिळालेल्या माहितीनुसार, नाशिकचा शुभम खैरनार आणि पुण्यातील धनंजय नावाच्या व्यक्तीने मिळून NEET प्रश्नपत्रिका लीक करण्याचा कट रचल्याचा संशय आहे. धनंजयने कथितरित्या 10 लाख रुपयांत प्रश्नपत्रिका शुभमला विकली होती. त्यानंतर शुभमने हीच प्रश्नपत्रिका टेलिग्रामद्वारे तब्बल 15 लाख रुपयांना विकल्याचा आरोप होत आहे. तपास यंत्रणांच्या माहितीनुसार, या प्रकरणात मोठ्या प्रमाणावर आर्थिक व्यवहार झाले असून प्रश्नपत्रिका हरियाणापर्यंत पोहोचल्याचंही उघड झालं आहे. या संपूर्ण रॅकेटमध्ये अनेक राज्यांतील व्यक्ती आणि एजंट्सचा सहभाग असण्याची शक्यता व्यक्त केली जात आहे. विशेष म्हणजे, लीक झालेली प्रश्नपत्रिका सुमारे 80 टक्के अचूक असल्याची माहिती समोर आली आहे. दरम्यान, एसओजीने या प्रकरणाशी संबंधित 150 विद्यार्थी आणि 70 पालकांची यादी CBIकडे सुपूर्द केली आहे. तसेच, एसओजीच्या ताब्यात असलेले 13 एमबीबीएस समुपदेशकही चौकशीसाठी CBIच्या स्वाधीन करण्यात आले आहेत. प्रकरणाचे धागेदोरे पुण्यापर्यंत या प्रकरणाचे धागेदोरे पुण्यापर्यंत पोहोचल्याची शक्यता असून, नाशिकमधून अटक करण्यात आलेल्या आरोपीचा आणखी एक साथीदार पुण्यात लपल्याचा संशय पोलिसांनी व्यक्त केला आहे. संबंधित तरुण मूळचा अहिल्यानगर जिल्ह्यातील असल्याची माहिती समोर आली असून, मंगळवार दुपारपासून त्याचा मोबाईल बंद असल्याचं पोलिस सूत्रांनी सांगितलं. संबंधिताचा शोध पुणे पोलिसांकडून सुरू आहे. विद्यार्थी आणि पालकांमध्ये संभ्रम दरम्यान, 3 मे रोजी देशभरात झालेली NEET परीक्षा रद्द झाल्यानंतर लाखो विद्यार्थ्यांमध्ये संभ्रम आणि चिंतेचं वातावरण निर्माण झालं आहे. लाखो विद्यार्थ्यांनी वर्षभर मेहनत घेऊन परीक्षेची तयारी केली होती. परीक्षा झाल्यानंतर काही विद्यार्थी गावी परतले, तर काही जण सुट्टीसाठी बाहेर गेले होते. मात्र, परीक्षा रद्द झाल्यानंतर आता पुढील परीक्षा कधी होणार, याबाबत विद्यार्थी आणि पालकांमध्ये अनिश्चितता निर्माण झाली आहे. तपास यंत्रणांच्या माहितीनुसार, नाशिकमधील संशयित आरोपी स्वतः मेडिकल काऊन्सलिंग एजन्सी चालवत होता. त्याने मोठी रक्कम मोजून प्रश्नपत्रिका मिळवली आणि नफ्यासाठी ती सोशल मीडियावर पसरवल्याचा आरोप आहे. इन्स्टाग्रामसह विविध प्लॅटफॉर्मवर प्रश्नपत्रिका व्हायरल झाल्यानंतर संपूर्ण देशात या प्रकरणाची चर्चा आहे. हेही वाचा : Gold Import Duty Hike: केंद्र सरकारचा रात्रीतून मोठा निर्णय ; आता सोनं-चांदी खरेदी करणं आणखी महागणार