नवी दिल्ली – भारतीय भालाफेकपटू नीरज चोप्राच्या पॅरिस ऑलिम्पिकच्या जर्सीचा जागतिक ॲथलेटिक्स हेरिटेज कलेक्शनमध्ये समावेश करण्यात आला आहे. टोकियो ऑलिम्पिक सुवर्णपदक विजेता नीरजने ऑगस्टमध्ये संपलेल्या पॅरिस ऑलिम्पिक स्पर्धेत रौप्य पदक जिंकले होते. त्याने हंगामातील सर्वोत्तम 89.45 मीटर थ्रो केला होता. पाकिस्तानच्या अर्शद नदीमने 92.97 मीटर फेक करून सुवर्णपदक जिंकले होते. 2020 च्या टोकियो ऑलिम्पिकमध्ये नीरजने सुवर्णपदक जिंकले होते.

सलग दोन ऑलिम्पिकमध्ये पदक जिंकणारा नीरज हा तिसरा भारतीय खेळाडू आहे. नीरजच्या आधी कुस्तीपटू सुशील कुमार आणि बॅडमिंटनपटू पीव्ही सिंधू यांनी सलग दोन ऑलिम्पिकमध्ये पदके जिंकली होती.

नीरज चोप्रा हा भारतीय इतिहासातील 2 ऑलिम्पिक पदके जिंकणारा चौथा भारतीय खेळाडू आहे. त्याच्या आधी कुस्तीमध्ये सुशील कुमार, बॅडमिंटनमध्ये पीव्ही सिंधू आणि नेमबाजीत मनू भाकर यांनीही दोन ऑलिम्पिक पदके जिंकली आहेत. यापैकी नीरज चोप्रा, सुशील कुमार आणि पीव्ही सिंधू यांनी सलग दोन ऑलिम्पिक स्पर्धेत ही पदके जिंकली. तर मनू भाकरने याच पॅरिस ऑलिम्पिकमध्ये नेमबाजीत दोन कांस्यपदके जिंकली होती.

जागतिक ॲथलेटिक्स  चॅम्पियनशिपमध्ये सुवर्णपदक जिंकणारा तो पहिला भारतीय खेळाडू आहे. त्याने गेल्या वर्षी बुडापेस्ट येथे झालेल्या जागतिक ॲथलेटिक्स  चॅम्पियनशिपमध्ये सुवर्णपदक जिंकले होते.

IND vs AUS 3rd Test | स्टीव्ह स्मिथनं रोहित शर्माचा मोठा विक्रम काढला मोडित, ‘अशी’ कामगिरी करणारा ठरला जगातील तिसरा खेळाडू…

पदार्पणात सुवर्णपदकासह इतिहास…

ज्युनियर आणि सीनियर सर्किट्समध्ये उत्कृष्ट कामगिरी केल्यानंतर नीरज टोकियो ऑलिम्पिकसाठी पात्र ठरला. पहिल्याच ऑलिम्पिकमध्ये त्याने 87.58 मीटर भालाफेक करून सुवर्णपदक जिंकले होते. 2022 मध्ये वर्ल्ड फायनलमध्ये रौप्य पदक आणि 2023 मध्ये सुवर्णपदक जिंकले. दरम्यान, स्टॉकहोम डायमंड लीगमध्ये त्याने 89.94 मीटर फेक करून राष्ट्रीय विक्रम केला, हा देखील नीरजचा वैयक्तिक सर्वोत्तम होता.