Supriya Sule – पुण्यामध्ये युती होणार नाही, हे मुख्यमंत्री देवेंद्र फडणवीस यांनी स्पष्ट केल्यानंतर राष्ट्रवादी अजित पवार यांच्या पक्षाकडून दुसर्या राष्ट्रवादीला साकडे घालण्यात आले होते. त्यामुळे दोन्ही राष्ट्रवादी एकत्र येणार का ? याची उत्सुकता सर्वांनाला लागली होती. उमेदवारी अर्ज भरण्याच्या प्रक्रियेला सुरुवात झाल्यानंतर अखेर दोन्ही राष्ट्रवादी एकत्र येण्यावर तत्वत: मान्यता मिळाली असल्याची माहिती राष्ट्रवादी शरदचंद्र पवार पक्षाच्या एका ज्येष्ठ नेत्याने दिली. मात्र, त्यानंतर असा कोणताही प्रस्ताव मिळाला नसल्याचे खा. सुप्रिया सुळे यांनी स्पष्ट केले आहे. दोन्ही राष्ट्रवादीची पुण्यामध्ये बैठक झाल्याची माहिती आहे. मात्र, त्यातील तपशील अजूनही गुलदस्त्यातच आहे. या बैठकीमध्ये उपस्थित असलेल्या जेष्ठ नेत्याने तत्वत: दोन्ही राष्ट्रवादीच्या युतीला मान्यता दिली असल्याचे सांगितले असले तरी देखील त्यांनी संध्याकाळी आम्ही आमच्या सोबतच्या इतर सहकाऱ्यांशी बोलणार असल्याचे स्पष्ट करताना सावध भूमिका घेतल्याचे दिसून आले. त्यामुळे नक्की युती झाली आहे की नाही हा संभ्रम अजूनही तसाच आहे. दरञान, या संदर्भात पक्षाच्या कार्याध्यक्षा असलेल्या खासदार सुप्रिया सुळे यांना विचारणा केली असता, त्या म्हणाल्या की, आमच्याकडे कोणताही प्रस्ताव पाठवण्यात आलेला नाही. युतीचा कोणाताही प्रस्ताव आमच्याकडून देखील गेलेला नाही. महाविकास आघाडीच्या वतीने युतीच्या मुद्द्यावर सविस्तर बैठक घेतली असून महाविकास आघाडीमध्ये कोणाला सामाविष्ट करुन घ्यायचे, याचा निर्णय सर्वांशी चर्चा करुन घेण्यात येणार असल्याचे त्यांनी स्पष्ट केले. निर्णय पुणेकरांचा विचार करुनच… कोणत्याही पक्षाशी आघाडी करण्याचा निर्णय हा पक्षाचे कार्यकर्ते, शहरातील जनता, शहराचा विकास या सर्व गोष्टींचा विचार करुनच घेतला जाणार आहे, असे खासदार सुप्रिया सुळे यांनी स्पष्ट केले. यावेळी त्यांना राष्ट्रवादी अजित पवार व कॉंग्रेस नेते सतेज पाटील यांच्यातील कथित फोनविषयी देखील विचारणा केली असता, त्यांनी या दोन्ही पक्षांमध्ये काहितरी सुरु असल्याचे सांगताना, दोन्ही पैकी एकाही पक्षाकडून औपचारिक प्रस्ताव मिळाला नसल्याचे देखील स्पष्ट केले.
