NCP Politics :  आगामी १८ जून रोजी होणाऱ्या महाराष्ट्र विधान परिषदेच्या निवडणुकीसाठी पुणे स्थानिक स्वराज्य संस्था मतदारसंघातून राष्ट्रवादी काँग्रेसने विक्रम काकडे यांना अधिकृत उमेदवारी जाहीर केली आहे. विक्रम काकडे आणि त्यांचे वडील, माजी राज्यसभा खासदार संजय काकडे यांनी सोमवारी उपमुख्यमंत्री सुनेत्रा पवार यांच्या नेतृत्वाखालील राष्ट्रवादी काँग्रेसमध्ये प्रवेश केला. त्यानंतर विक्रम काकडे यांनी उमेदवारी अर्ज दाखल केला.

मात्र, राष्ट्रवादी काँग्रेसचे पुणे शहराध्यक्ष सुनील टिंगरे यांनीही उमेदवारी अर्ज भरल्याने पक्षात बंडखोरीची चर्चा सुरू झाली आहे. यावर पक्षाचे प्रवक्ते उमेश पाटील यांनी स्पष्टीकरण देताना विक्रम काकडे हे पक्षाचे अधिकृत उमेदवार असून सुनील टिंगरे हे ‘समर्थक उमेदवार’ असल्याचे सांगितले.

“पक्षामध्ये कोणताही संभ्रम नाही. विक्रम काकडे यांनी पक्षप्रवेशाची औपचारिकता पूर्ण केल्यानंतर त्यांची उमेदवारी जाहीर करण्यात आली,” असे पाटील यांनी स्पष्ट केले.

तो डमी अर्ज नाही – सुनील टिंगरे

दरम्यान, उमेदवारी अर्ज दाखल केल्यानंतर सुनील टिंगरे यांनी आपला अर्ज ‘डमी अर्ज’ नसल्याचे सांगितले. “मी अर्ज भरला आणि दाखल केला आहे. तो डमी अर्ज नाही. इतरजण काय म्हणतात यावर मला भाष्य करायचे नाही. पक्ष नेतृत्व जो निर्णय घेईल, त्याचे पालन करेन,” असे टिंगरे म्हणाले.

यापूर्वी संजय काकडे आणि विक्रम काकडे यांनी सुनेत्रा पवार, खासदार पार्थ पवार आणि जय पवार यांच्या उपस्थितीत राष्ट्रवादी काँग्रेसमध्ये प्रवेश केला.

हेही वाचा –  “सुप्रिया ताईंनी मला…”, भाजपकडून उमेदवारी जाहीर झाल्यानंतर उद्योगपती अरुण लखानींची प्रतिक्रिया 

यावेळी बोलताना संजय काकडे म्हणाले, “अजितदादांशी माझे अनेक वर्षांचे जिव्हाळ्याचे संबंध आहेत. त्यांच्या मुलांनीही नेहमीच माझ्यावर प्रेम केले. त्यांच्यावरील आपुलकी आणि आदर याच भावनेतून मी राष्ट्रवादी काँग्रेसमध्ये प्रवेश केला आहे. पक्ष नेतृत्व जे आदेश देईल, त्यानुसार काम करेन.”

विक्रम काकडे यांनी उमेदवारी दिल्याबद्दल सुनेत्रा पवार आणि राष्ट्रवादी काँग्रेसचे आभार मानले.

दरम्यान, स्थानिक स्वराज्य संस्था मतदारसंघातील १६ जागांसह नागपूर स्थानिक स्वराज्य संस्था मतदारसंघातील पोटनिवडणुकीसाठी १८ जून रोजी मतदान होणार असून उमेदवारी अर्ज दाखल करण्याचा सोमवार हा अखेरचा दिवस होता.