Gokul Chairman Election 2026 : कोल्हापूर जिल्ह्याच्या राजकारणात प्रतिष्ठेची बनलेली गोकुळ दूध संघाच्या अध्यक्षपदाची निवडणूक अखेर महायुतीने जिंकली आहे. महायुतीचे उमेदवार राजेश पाटील यांनी सतेज पाटील यांच्या समविचारी आघाडीचे उमेदवार शशिकांत चुयेकर यांचा 16 विरुद्ध 13 मतांनी पराभव केला. या निकालाने सतेज पाटील यांना मोठा राजकीय धक्का बसला असून महायुतीच्या गोटात जल्लोष सुरू झाला आहे.

विशेष म्हणजे, एकेकाळी अजित पवार यांनी राजेश पाटील यांना ‘माझा उजवा हात’ असे संबोधत त्यांच्या पराभवाची जाहीर खंत व्यक्त केली होती. आता त्याच विश्वासू नेत्याने गोकुळच्या सत्तेवर आपले नाव कोरले आहे. त्यामुळे या विजयाला केवळ सहकारी संस्थेच्या निवडणुकीपुरते मर्यादित न ठेवता कोल्हापूरच्या राजकारणातील महत्त्वाची घडामोड मानली जात आहे.

राजेश पाटील यांची अध्यक्ष म्हणून नियुक्ती झाली असून, त्यांची पहिली प्रतिक्रिया समोर आली आहे. माध्यमांशी बोलताना ते म्हणाले की, “मी प्रथमतः सर्व दुध उत्पादक शेतकऱ्यांचे आभार मानतो. माझ्यावर दूध संघाची जबाबदारी सोपवली आहे. मी सर्वांसाठी हिताचं काम करेन. गोकुळचं वैभव वाढवण्यासाठी मी प्रयत्न करेन. गेल्या वर्षभरातला तोटा भरून काढण्यासाठी नियोजन करु.

कोर्टातून आदेश प्राप्त झाल्यानंतर निवड प्रक्रिया पूर्ण झाली. निवडणुकीच्यावेळी विरोधक होतो आता त्यांनीही सर्वानी दूध उत्पादक शेतकऱ्यांच्या हिताचे निर्णय करुयात. त्यासाठी हातात हात घेऊन काम करुयात, अशी अपेक्षा आहे. झालेलं विसरुन एकदिलान काम करुयात. पुढील पाच वर्ष बाकीचं सर्व राजकारण बाजूला ठेऊयात. शेतकऱ्यांच्या हितासाठी काम करु, ६२ वर्षांनंतर चंदगडसारख्या भागाला नेतृत्त्व मिळालं, अशी प्रतिक्रिया राजेश पाटील यांनी यावेळी दिली आहे.

सतेज पाटलांचे संख्याबळ असूनही बाजी महायुतीची!

गोकुळच्या अध्यक्षपदाची निवडणूक सुरुवातीपासूनच अत्यंत चुरशीची बनली होती. संचालक मंडळात समविचारी आघाडीचे 13, तर महायुतीचे 12 संचालक होते. त्यामुळे सतेज पाटील यांच्या नेतृत्वाखालील आघाडीचे पारडे जड असल्याचे चित्र होते. मात्र, शासननियुक्त चार संचालकांच्या मतदानाच्या अधिकारामुळे संपूर्ण निवडणुकीचे गणित बदलले.

उच्च न्यायालयाच्या औरंगाबाद खंडपीठाच्या आदेशानंतर 10 नोव्हेंबर रोजी ही निवडणूक पार पडली. सुरुवातीलाच समविचारी आघाडीच्या संचालकांनी शासननियुक्त सदस्यांच्या मतदानाच्या अधिकारावर आक्षेप घेतला. निवडून न आलेल्या सदस्यांना मतदानाचा अधिकार कसा मिळू शकतो, असा सवाल उपस्थित करण्यात आला.

मात्र, संबंधित सरकारी अध्यादेश, नियम आणि न्यायालयीन आदेशांचा दाखला देत हा आक्षेप फेटाळण्यात आला. त्यानंतर प्रत्यक्ष निवडणूक प्रक्रिया पार पडली. अखेर राजेश पाटील यांनी 16 मते मिळवत बाजी मारली, तर शशिकांत चुयेकर यांना 13 मतांवर समाधान मानावे लागले. त्यामुळे महायुतीने गोकुळच्या अध्यक्षपदावर आपले वर्चस्व सिद्ध केले.

कोण आहेत राजेश पाटील?

राजेश नरसिंगराव पाटील हे राष्ट्रवादी काँग्रेसचे माजी आमदार असून त्यांनी कोल्हापूर जिल्ह्यातील चंदगड विधानसभा मतदारसंघाचे प्रतिनिधित्व केले आहे. त्यांचे वडील नरसिंग गुरुनाथ पाटील हेसुद्धा आमदार होते. त्यामुळे राजेश पाटील यांना राजकारणाचा वारसा घरातूनच मिळाला.

2019 च्या विधानसभा निवडणुकीत ते चंदगडमधून आमदार म्हणून निवडून आले होते. राष्ट्रवादी काँग्रेसचे ज्येष्ठ नेते हसन मुश्रीफ आणि दिवंगत अजित पवार यांचे विश्वासू सहकारी म्हणून त्यांची ओळख होती. मात्र, 2024 च्या विधानसभा निवडणुकीत भाजपचे बंडखोर उमेदवार शिवाजी पाटील यांनी त्यांचा पराभव केला.

हा पराभव अजित पवार यांच्या चांगलाच जिव्हारी लागला होता. आता विधानसभा निवडणुकीतील पराभवानंतर राजेश पाटील यांनी गोकुळच्या अध्यक्षपदावर मिळवलेला विजय त्यांच्या राजकीय पुनरागमनाच्या दृष्टीने महत्त्वाचा मानला जात आहे.