Navnath Ban’s response to the challenge posed by Vivekananda Patil : पुण्यात सुरू असलेल्या MPSC विद्यार्थ्यांच्या आंदोलनावरून राज्यातील राजकीय वातावरण तापले आहे. या आंदोलनावरून सत्ताधारी आणि विरोधकांमध्ये आरोप-प्रत्यारोप सुरू असून, भाजपचे प्रवक्ते नवनाथ बन आणि आंदोलनातील प्रमुख चेहरा विवेकानंद पाटील यांच्यात शाब्दिक संघर्ष पाहायला मिळत आहे.

भाजप प्रवक्ते नवनाथ बन यांनी हे आंदोलन आमदार रोहित पवार यांचे राजकीय आंदोलन असल्याची टीका केली होती. तसेच आंदोलनस्थळी रात्री सुरू असलेल्या कथित धांगडधिंग्याचा व्हिडिओ दाखवत त्यांनी काही प्रश्न उपस्थित केले होते. त्यानंतर आंदोलनाचे नेतृत्व करणाऱ्या विवेकानंद पाटील यांनी नवनाथ बन यांच्यावर जोरदार टीका केली. आता या टीकेला नवनाथ बन यांनी प्रत्युत्तर दिले आहे.

नवनाथ बन यांचं विवेकानंद पाटलांना प्रत्युत्तर

विवेकानंद पाटील यांनी नवनाथ बन यांना नवनाथ संप्रदायातील नऊ नाथ कोणते आहेत आणि नाथ संप्रदायाचा भागवत संप्रदायाशी काय संबंध आहे, हे सांगण्याचे आव्हान दिले होते. या आव्हानाला उत्तर देताना नवनाथ बन यांनी नाथ परंपरेचा उल्लेख करत आपली भूमिका मांडली. “आम्ही नाथपंथी आहोत, याचा आम्हाला अभिमान आहे. ज्ञानोबांनी नाथ परंपरा भागवत धर्मापर्यंत आणून ठेवली आहे. मंत्राचा जप करत मी लहानाचा मोठा झालो आहे,” असे नवनाथ बन म्हणाले.

विवेकानंद पाटील यांनी काय म्हटलं होतं?

नवनाथ बन यांच्या आरोपांना उत्तर देताना विवेकानंद पाटील यांनी त्यांच्यावर टीका केली होती. “नवनाथ संप्रदायातील नऊ नाथ कोणते आहेत आणि भागवत संप्रदायासोबत नवनाथ संप्रदायाचा काय संबंध आहे, हे सांगितले तर मी त्यांना उत्तर देईन,” असे आव्हान त्यांनी दिले होते.

MPSC आंदोलनावरून राजकीय आरोप-प्रत्यारोप

MPSC विद्यार्थ्यांच्या विविध मागण्यांसाठी सुरू असलेल्या आंदोलनाला अनेक बड्या राजकीय नेत्यांनी पाठिंबा दिला आहे. मात्र, आंदोलनाच्या स्वरूपावरून आणि त्यामागील राजकीय भूमिकांवरून आरोप-प्रत्यारोप सुरू आहेत. भाजपकडून आंदोलनावर प्रश्न उपस्थित केले जात असताना, विद्यार्थ्यांच्या मागण्यांबरोबरच नवनाथ बन आणि विवेकानंद पाटील यांच्यातील वार पलटवाराची जोरदार चर्चा आहे.

October Heat: ऑक्टोबरच्या उष्णतेपासून स्वतःचा बचाव कसा कराल? जाणून घ्या डॉक्टरांचा सल्ला