Nashik Municipal Corporation : नाशिक महानगरपालिकेत स्वीकृत नगरसेवकांच्या नियुक्तीवरून मित्रपक्ष असलेल्या काँग्रेस आणि ठाकरेसेनेत दोन जागांसाठी जोरदार लॉबिंग सुरू झाल्याची माहिती आहे. या महापालिकेत ठाकरेसेनेकडे 15, तर काँग्रेसचे 3 नगरसेवक आहेत. तरीही स्वीकृत नगरसेवकांच्या दोन जागांपैकी एक जागा काँग्रेसला द्यावी, अशी मागणी काँग्रेसकडून करण्यात येत आहे. या पार्श्वभूमीवर काँग्रेसने हा मुद्दा पक्षाच्या वरिष्ठ नेत्यांपर्यंत पोहोचवला आहे. लवकरच निर्णय होण्याची अपेक्षा व्यक्त केली जात आहे. महापालिकेत दोन्ही पक्ष एकत्र असल्यामुळे काँग्रेसलाही एक जागा मिळावी अशी त्यांची भूमिका आहे. स्थानिक पातळीवर चर्चा सुरू असून महाविकास आघाडीच्या बैठकीतही हा विषय मांडला जाणार असल्याचे शहराध्यक्ष आकाश छाजेड यांनी सांगितले. काँग्रेसकडून निवडणूक लढवलेल्या उमेदवाराऐवजी पक्ष संघटन मजबूत करण्यासाठी काम करणाऱ्या कार्यकर्त्याला स्वीकृत नगरसेवकपद देण्याचा विचार सुरू आहे. पुढील दोन ते तीन दिवसांत काँग्रेसकडून नाव जाहीर होण्याची शक्यता आहे. नाशिककरांच्या प्रश्नांसाठी दोन्ही पक्ष एकत्र काम करत राहतील, असा विश्वास काँग्रेसने व्यक्त केला आहे. नाशिकमध्ये काँग्रेस, राष्ट्रवादी(शप), ठाकरेसेना आणि मनसे यांनी एकत्रित लढवली होती. मात्र निकालानंतर महापालिकेत वेगवेगळी समीकरणे तयार होत, काँग्रेस आणि ठाकरेसेना यांचा एक गट तर, मनसेने शिंदेसेनेसोबत जात सत्तेत सहभाग घेतला.
