Ambadas Danve : छत्रपती संभाजीनगर येथे पंचायत समितीच्या सभापती आणि उपसभापती निवडीपूर्वी मोठा गोंधळ झाल्याची घटना समोर आली आहे. या दरम्यान उद्धव ठाकरे गटाचे नेते अंबादास दानवे यांनी भाजपचे नेते कल्याणराव गायकवाड यांची कॉलर पकडल्याचा व्हिडिओ समोर आला असून तो सध्या मोठ्या प्रमाणावर चर्चेत आहे. जिल्हा परिषद आणि पंचायत समिती निवडणुकांमध्ये राज्यभर भाजप आणि महायुतीला चांगले यश मिळाले आहे. छत्रपती संभाजीनगर जिल्हा परिषदेत भाजपला बहुमत मिळाले असले तरी संभाजीनगर पंचायत समितीत मात्र कोणत्याही एका पक्षाला स्पष्ट बहुमत मिळालेले नाही. त्यामुळे सभापती आणि उपसभापती निवडीवरून राजकीय हालचाली वाढल्या आहेत. सभापती आणि उपसभापती पदाच्या निवडीपूर्वी भाजप आणि उद्धव ठाकरे गटाच्या शिवसेनेचे कार्यकर्ते आमनेसामने आले. सुरुवातीला दोन्ही गटांमध्ये शाब्दिक वाद झाला आणि त्यानंतर परिस्थिती अधिक चिघळली. या दरम्यान अंबादास दानवे यांनी भाजपचे नेते कल्याणराव गायकवाड यांची कॉलर पकडल्याचे दृश्य समोर आले आहे. या घटनेचा व्हिडिओ सध्या समाजमाध्यमांवर वेगाने प्रसारित होत आहे. सभापतीपदासाठी आवश्यक आकडे (Ambadas Danve) संभाजीनगर पंचायत समितीत एकूण २० सदस्य आहेत. सभापतीपद मिळवण्यासाठी किमान ११ सदस्यांचा पाठिंबा आवश्यक आहे. सध्या भाजपकडे ७ सदस्य आहेत, तर एकनाथ शिंदे यांच्या शिवसेनेकडे ६ सदस्य आहेत. उद्धव ठाकरे गटाकडे ४ सदस्य असून काँग्रेस, राष्ट्रवादी आणि प्रहार या पक्षांकडे प्रत्येकी एक सदस्य आहे. सभापती आणि उपसभापती निवडणुकीत उद्धव ठाकरे गटाची भूमिका निर्णायक ठरणार आहे. ज्यांच्याकडून उपसभापती पद दिले जाईल, त्या पक्षाला सभापतीपदासाठी पाठिंबा देण्याची भूमिका या गटाने घेतल्याची माहिती समोर येत आहे. त्यामुळे दोन शिवसेना एकत्र येण्याची शक्यता व्यक्त केली जात आहे. आज होणार निवड Ambadas Danve संभाजीनगर जिल्ह्यातील विविध पंचायत समित्यांच्या सभापती आणि उपसभापती पदासाठी मंगळवारी निवडणुका होत आहेत. जिल्हाधिकारी दिलीप स्वामी यांनी या निवडणुकीचा कार्यक्रम जाहीर केला असून पीठासन अधिकारी म्हणून उपजिल्हाधिकाऱ्यांची नियुक्ती करण्यात आली आहे. दुपारी दोन वाजता सभापती आणि उपसभापती निवडीची बैठक आयोजित करण्यात आली आहे. दरम्यान, पैठण पंचायत समितीत शिंदे गटाच्या शिवसेनेचे सदस्य सर्वाधिक असल्याने तेथे सभापती आणि उपसभापती पदासाठी त्यांचा उमेदवार बिनविरोध निवडून येण्याची शक्यता व्यक्त केली जात आहे.
