Narendra Modi : पंतप्रधान नरेंद्र मोदी (Narendra Modi) यांच्या आगामी ऑस्ट्रेलिया दौऱ्यापूर्वी एक खळबळजनक माहिती समोर आली आहे. पंतप्रधान मोदींना सोशल मीडियाच्या माध्यमातून जीवे मारण्याची धमकी देण्यात आल्यामुळे आंतरराष्ट्रीय पातळीवर सुरक्षा यंत्रणा कमालीच्या सतर्क झाल्या आहेत.

मेलबर्न येथे आयोजित करण्यात आलेल्या “मेलबर्न मीट्स मोदी” या विशेष कार्यक्रमाच्या प्रचारासाठी फेसबुकवर एक पोस्ट शेअर करण्यात आली होती. या पोस्टच्या कमेंट सेक्शनमध्ये एका युझरने पंतप्रधानांना उद्देशून ही गंभीर धमकी दिली. ही बाब निदर्शनास येताच ऑस्ट्रेलियातील सुरक्षा यंत्रणांनी तात्काळ या प्रकरणाची गंभीर दखल घेत सखोल तपास सुरू केला आहे.

फेसबुक कमेंटमधून दिली धमकी
पंतप्रधान नरेंद्र मोदी (Narendra Modi)  येत्या ८ ते १० जुलैदरम्यान ऑस्ट्रेलियाच्या मेलबर्न दौऱ्यावर जाणार आहेत. या दौऱ्यादरम्यान ९ जुलै रोजी मेलबर्नमधील प्रसिद्ध मार्व्हल स्टेडियममध्ये ‘मेलबर्न मीट्स मोदी’ या भव्य कार्यक्रमाचे आयोजन करण्यात आले आहे.

या कार्यक्रमाच्या प्रसिद्धीसाठी सोशल मीडियावर करण्यात आलेल्या एका फेसबुक पोस्टवर ‘अबू मुस्तफा’ नावाच्या अकाऊंटवरून धमकीची कमेंट करण्यात आली. “स्टेडियमचे छत बंद ठेवावे, अन्यथा मोदी ऑस्ट्रेलियात त्यांच्या मृत्यूसाठी येत आहेत,” अशा प्रक्षोभक आणि धमकीच्या भाषेत ही कमेंट लिहिण्यात आली होती. ही कथित धमकी समोर आल्यानंतर एकच खळबळ उडाली असून सुरक्षा यंत्रणांनी सुरक्षेचा आढावा घेण्यास सुरुवात केली आहे.

ऑस्ट्रेलियन सुरक्षा यंत्रणांकडून तपास सुरू
या गंभीर प्रकरणाचा तपास ऑस्ट्रेलियन फेडरल पोलिसांसह तिथल्या स्थानिक सुरक्षा यंत्रणा करत आहेत. ऑस्ट्रेलियन तपास अधिकाऱ्यांनी तांत्रिक विश्लेषण करून संबंधित फेसबुक अकाऊंटशी जोडलेल्या आयपी अ‍ॅड्रेसची ओळख पटवली आहे. या प्रकरणाची चौकशी अत्यंत गोपनीय आणि गांभीर्याने केली जात असून, ऑस्ट्रेलियन पोलिसांनी तपासाचा अधिक तपशील देण्यास सध्या नकार दिला आहे. या प्रकरणी अद्याप कोणालाही अटक करण्यात आलेली नसली, तरीही संशयिताचा शोध वेगाने सुरू आहे.

पंतप्रधान मोदींचा नियोजित ऑस्ट्रेलिया दौरा
पंतप्रधान नरेंद्र मोदी ८ ते १० जुलै या कालावधीत ऑस्ट्रेलियाच्या दौऱ्यावर असणार आहेत. या महत्त्वपूर्ण दौऱ्यात ते मेलबर्न येथे आयोजित भारत-ऑस्ट्रेलिया वार्षिक लीडर्स समिटमध्ये (Sh शिखर परिषद) सहभागी होणार आहेत.

या शिखर परिषदेदरम्यान ते ऑस्ट्रेलियाचे पंतप्रधान अँथनी अल्बनीज यांच्यासोबत द्विपक्षीय संबंध दृढ करण्यासाठी सविस्तर चर्चा करतील. या अधिकृत बैठकांव्यतिरिक्त, मार्व्हल स्टेडियमवरील कार्यक्रमात पंतप्रधान मोदी ऑस्ट्रेलियात स्थायिक झालेल्या आणि तिथे राहणाऱ्या हजारो भारतीय समुदायाच्या नागरिकांना संबोधित करणार आहेत. या दौऱ्याच्या पार्श्वभूमीवर आता ऑस्ट्रेलियन प्रशासनाकडून पंतप्रधानांच्या (Narendra Modi)  सुरक्षेत मोठी वाढ करण्यात येण्याची शक्यता आहे.