Narendra Modi : पंतप्रधान नरेंद्र मोदी (Narendra Modi) यांनी शुक्रवारी हरियाणामधील जिंद आणि सोनीपत यांना जोडणाऱ्या भारताच्या पहिल्या हायड्रोजन-संचालित प्रवासी ट्रेनला हिरवा झेंडा दाखवून रवाना केले. या ऐतिहासिक यशामुळे हायड्रोजन तंत्रज्ञानाचा वापर करून गाड्या चालवणाऱ्या जगातील मोजक्या प्रगत देशांच्या पंक्तीत भारताने स्थान मिळवले आहे.

८९ किलोमीटरचे हे अंतर ही गाडी दोन तासांत कापणार असून मार्गावरील १२ स्थानकांवर थांबेल. या उद्घाटन प्रसंगी रेल्वेमंत्री अश्विनी वैष्णव आणि हरियाणाचे मुख्यमंत्री नायब सिंग सैनी उपस्थित होते.

पूर्णपणे भारतातच डिझाइन आणि विकसित करण्यात आलेली ही हायड्रोजन ट्रेन शून्य कार्बन उत्सर्जनाचे उद्दिष्ट साध्य करते. ही गाडी हायड्रोजन फ्युएल सेल तंत्रज्ञानावर चालते, जे हायड्रोजनचे विजेमध्ये रूपांतर करून गाडीला गती देते.

या प्रक्रियेत धुराऐवजी केवळ पाण्याची वाफ बाहेर पडते, ज्यामुळे प्रदूषण पूर्णपणे रोखले जाते. तसेच, या गाड्या डिझेल गाड्यांच्या तुलनेत अत्यंत कमी आवाजात धावतात. पारंपरिक इलेक्ट्रिक गाड्यांप्रमाणे या हायड्रोजन ट्रेनला ओव्हरहेड वीज वाहिन्यांची गरज नसते, कारण ती स्वतःच वीज निर्माण करते. १० डब्यांची रचना असलेली ही गाडी आतापर्यंत जगातील सर्वात लांब हायड्रोजन प्रवासी गाड्यांपैकी एक आहे.

तिची ३,२०० एचपी क्षमतेची प्रोपल्शन प्रणाली तिला अत्यंत शक्तिशाली बनवते. भारताच्या शाश्वत आणि पर्यावरणपूरक वाहतूक व्यवस्थेकडे होणाऱ्या वाटचालीत हे एक क्रांतिकारी पाऊल (Narendra Modi) ठरले आहे.