– शेरखान शेख
Nag Panchami – नागपंचमीला महिला नागाच्या वारुळाची पूजा करीत तर काही महिला चक्क नागांची देखील पूजा करतात. मात्र, शिरुर तालुक्यातील शुभांगी टिळेकर व हवेली तालुक्यातील साक्षी वाघमारे या एक दिवस नव्हे तर वर्षभर नागांची सेवा करण्याचे धाडसी काम करुन समाजात आदर्श निर्माण करीत आहेत. या दोघीजणी समाजात जनजागृतीचे काम करीत आहेत.

पिंपळे जगताप येथील थिटे कुटुंबातून विवाहानंतर तळेगाव ढमढेरे येथील सर्पमित्र गणेश टिळेकर यांच्या पत्नी झालेल्या शुभांगी यांनी तसेच वाघोलीतील सर्पमित्र अभिजित वाघमारे यांच्या पत्नी साक्षी वाघमारे यांनी आपल्या पतीकडून सर्परक्षण व संवर्धनाचे धडे घेऊन सापांची सेवा करु लागल्या आहेत. गावासह परिसरात अनेक ठिकाणी साप निघाल्यानंतर नागरिक शुभांगी टिळेकर व साक्षी वाघमारे यांना बोलावून घेत असल्याने त्या देखील कोठे साप निघाल्यास सापाला पकडून निसर्गात मुक्त करण्याचे धाडसी काम करीत आहेत.

अनेक भलेमोठे नाग सुद्धा पकडून निसर्गात मुक्त केले आहेत. परिसरात सापांबाबत जनजागृती देखील करीत असल्याने त्यांनी आपल्या कार्याचा ठसा उमटवला आहे. शुभांगी टिळेकर यांनी शिरुर तालुक्यातील पहिल्या धाडसी महिला सर्पमित्र म्हणून ओळख निर्माण केली आहे. नागपंचमी जवळ आलेली असताना महिला नागांची तसेच वारुळाची पूजा करीत सण साजरा करतात. मात्र, शुभांगी टिळेकर व साक्षी वाघमारे या एक दिवस नव्हे तर वर्षभर सापांसह नागांचे रक्षण करुन सामाजात आदर्श निर्माण करीत आहे.