जामखेड : नागपंचमीच्या औचित्याने जामखेडच्या ऐतिहासिक व धार्मिक परंपरेत भर घालणाऱ्या कुस्त्यांच्या भव्य मैदानाची उत्सुकता शिगेला पोहोचली आहे. नागेश्वराच्या पावनभूमीत कै. विष्णू उस्ताद काशीद प्रतिष्ठान व ॲड. अजय काशीद मित्र परिवाराच्या वतीने सलग २४ व्या वर्षी भव्य-दिव्य निकाली कुस्त्यांच्या मैदानाचे आयोजन करण्यात आले आहे. हे मैदान मंगळवार, १८ ऑगस्ट रोजी दुपारी १ वाजता जामखेड महाविद्यालय, जामखेड येथे पार पडणार आहे.

​जामखेडच्या नागपंचमी यात्रेचा नावलोकीक राज्यभरात आहे. मात्र, गेल्या काही वर्षांत या यात्रेचे मुख्य आकर्षण ठरले आहे ते म्हणजे काशीद प्रतिष्ठानचे कुस्ती मैदान! मराठा गौरव युवराजभाऊ काशीद व उपमहाराष्ट्र केसरी बबन काका काशीद यांच्या मार्गदर्शनाखाली आणि जिल्हा नियोजन समितीचे सदस्य ॲड. अजय काशीद यांच्या कुशल नियोजनाखाली हे मैदान दरवर्षी मोठ्या उत्साहात पार पडते. केवळ महाराष्ट्रातीलच नव्हे, तर देशातील वेगवेगळ्या राज्यांतील नामवंत पैलवान आणि विविध क्षेत्रांतील मान्यवर या मैदानाला आवर्जून उपस्थिती लावतात.

या कुस्ती मैदानाचे उद्घाटन महाराष्ट्र राज्य विधान परिषदेचे सभापती नामदार प्रा. राम शिंदे यांच्या प्रमुख उपस्थितीत होणार आहे. तत्पूर्वी, दुपारी १२ वाजता जामखेड येथील प्रसिद्ध शनी मंदिरापासून भव्य मिरवणुकीला सुरुवात होईल. या मिरवणुकीचे प्रमुख आकर्षण म्हणजे ‘मराठा भाषीय संघ, मध्य प्रदेश’चे अध्यक्ष मराठा गौरव युवराजभाऊ काशीद यांची विशेष उपस्थिती असणार आहे.

पहिली मानाची कुस्ती: पै. रविराज चव्हाण (आंतरराष्ट्रीय आखाडा, पुणे) विरुद्ध पै. महारुद्र काळे (कुर्डुवाडी)
​दुसरी कुस्ती: पै. मोईन पटेल (कुर्डुवाडी) विरुद्ध पै. मुसा पैलवान (महापौर केसरी, इंदूर)
​तिसरी कुस्ती: पै. रोहित दैया (शाहू कुस्ती केंद्र) विरुद्ध पै. शाहरुख खान (पुणे)
​चौथी कुस्ती: पै. सौरभ गाडे (पाटोदा) विरुद्ध पै. तात्या घुले (कोल्हापूर)
​पांचवी कुस्ती: पै. पृथ्वीराज वनवे (शंभूराजे कुस्ती संकुल, जामखेड) विरुद्ध पै. अमोल दिंडे (चाऊस आष्टी) होणार आहे.
​
यावर्षीच्या कुस्ती मैदानाचे विशेष वैशिष्ट्य म्हणजे वेळेचे आणि नियोजनाचे काटेकोर पालन केले जाणार आहे. आधीच ठरवून दिलेल्या मानाच्या आणि नियोजित कुस्त्याच मैदानात होतील; ऐनवेळी कोणतीही अतिरिक्त कुस्ती लावली जाणार नाही, अशी माहिती आयोजकांनी दिली आहे.

आजच्या काळात तरुण वर्ग व्यसनाधीनतेकडे किंवा चुकीच्या मार्गाकडे वळत असताना, ग्रामीण भागातील तरुणांना क्रीडा संस्कृतीची आवड निर्माण व्हावी आणि आरोग्यदायी मार्ग मिळावा, यासाठी ॲड. अजय काशीद यांच्या माध्यमातून हे मोठे व्यासपीठ उभारले जात आहे. राजकीय सामाजिक जीवनात काम करत असताना क्रीडा आणि सामाजिक उपक्रमांची ही जोड ॲड. अजय काशीद यांची वेगळी ओळख निर्माण करत आहे.

​या भव्य कुस्ती मैदानास आणि परंपरेचा वारसा जपणाऱ्या या सोहळ्यास सर्व कुस्ती शौकीन, नागरिक आणि पैलवानांनी मोठ्या संख्येने उपस्थित राहावे, असे आवाहन ॲड. अजय काशीद, काशीद परिवार व ॲड. अजय काशीद मित्र परिवाराच्या वतीने करण्यात आले आहे.