खंडाळा: महाराष्ट्रातील पती-पत्नी बेंगलोरमध्ये राहत असताना आपण पुन्हा मुंबईला राहायला जाऊ या कारणावरून दोघांमध्ये वारंवार होणारा वाद विकोपाला जाऊन पतीने पत्नीचा चाकूने खून केला असल्याची धक्कादायक घटना घडली होती. त्यानंतर आतापर्यंत या घटनेत अनेक धक्कादायक खुलासे होत आहेत. अशातच पतीनेच पत्नीचा खून केल्याची घटना एका दुचाकीस्वार आणि पोलीस प्रशानाने दाखवलेल्या तप्तपरतेमुळे उघडकीस आली आहे. मयत पत्नीच मृतदेह बॅगेत ठेवून पती आपल्या कारमधून मुंबईच्या दिशेने निघाला असताना मध्येच त्याने तणावात येऊन शिरवळ परिसरात विषारी औषध प्राशन करत आत्महत्येचा प्रयत्न केला. यावेळी एका जागरूक दुचाकी चालकाने दाखवलेल्या प्रसंगावधानामुळे व पोलीस प्रशासनाच्या तत्परतेमुळे हा खूनाचा प्रकार उघडकीस आला आहे. गौरी राकेश खेडेकर (वय 32,सध्या बनारगट्टा तेजस्विनी नगर बेंगलोर,मूळ रा. जोगेश्वरी, मुंबई, महाराष्ट्र) असे खून झालेल्या विवाहितेचे नाव असून याप्रकरणी राकेश राजेंद्र खेडेकर (वय 35) याला शिरवळ पोलीसांनी ताब्यात घेत बंगलोर पोलिसांच्या स्वाधीन केले असून, विषप्राशन केल्याने अधिक उपचाराकरिता शिरवळ येथील खाजगी रुग्णालयातून पुणे येथील ससून रुग्णालयात दाखल करण्यात आले आहे. याबाबतची घटनास्थळावरून व पोलीसांनी दिलेली अधिक माहिती अशी कि, राकेश राजेंद्र खेडेकर (वय 35,जोगेश्वरी मुंबई) हा मुंबई येथून बेंगलोर येथे फेब्रुवारी 25 मध्ये आपली पत्नी गौरी खेडेकर हिच्यासबोत कामानिमित्त स्थायिक झाला. राकेश खेडेकर हा एक आंतरराष्ट्रीय कंपनीमध्ये एटीएमसंबंधित प्रणालीतून घरातून काम करीत असून त्याची पत्नी गौरी खेडेकर हि कामाच्या शोधात होती. दरम्यान, बुधवार दि. 26 मार्च 2025 चे मध्यरात्री 1 वाजण्याच्या सुमारास राकेश खेडेकर याचेकडे पत्नी गौरी खेडेकर हिने पुन्हा मुंबईला जाण्याचा आग्रह धरला. याकारणाने दोघांमध्ये जोरदार वाद झाला. पत्नीवर चाकूने वार राकेश खेडेकर याने आपण बंगलोरमध्ये राहत असलेल्या घराचे अनामत रक्कम भरलेली आहे, आपण जर सदरचे घर सोडले तर घर मालक अनामत रक्कम परत करणार नाही व येथे स्थायिक होण्याकरिता आपले पैसे खूप खर्च झाले आहे, असे समजावण्याचा प्रयत्न केला. अचानकपणे गौरी खेडेकर हिने किचनमधील चाकू घेत राकेश खेडेकर यालाच मारण्याची भीती दाखविल्याने राकेशचा राग झाला आणि त्याने पत्नी गौरी खेडेकरच्या हातातील चाकू घेत मानेवर, गळ्यावर आणि पाठीवर सपासप वार केले. यामध्ये गौरी खेडेकर हि गंभीर जखमी झाली आणि तिचा जागीच मयत झाल्याची खात्री राकेश खेडेकर याने केली. मृतदेह बॅगेत अन्… राकेशने घरातील मोठी बॅग रिकामी करून त्यामध्ये गौरीचा मृतदेह बॅगेत भरत बॅग घराच्या शौचालयाच्या बाहेर ठेवली. यावेळी गुरुवार दि. 27 मार्च 2025 चे मध्यरात्री 12 वाजण्याच्या दरम्यान राकेश खेडेकर याने घरातील साहित्य सोबत घेऊन त्याच्या गाडीतून जोगेश्वरी मुंबई येथे जाण्याकरिता बेंगलोर येथून निघाला. यावेळी पत्नी गौरी खेडेकर हिचा खून केल्यामुळे राकेश खेडेकर हा मानसिकरित्या खचत महाराष्ट्रातील कागल गावच्या हद्दीत आला आला. एका मेडिकलमधून फिनाईल व झुरळ मारण्याचे विषारी औषध घेऊन कोल्हापूर कराड येथे प्रवास करीत असताना राकेशने त्याचे बेंगलोर येथील इमारतीमधील खालचे मजल्यावर राहणाऱ्या व्यक्तीला दूरध्वनी करीत पत्नी गौरी खेडेकर हिच्या खून व बॅगेबद्दल माहिती दिली. पतीचा आत्महत्येचा प्रयत्न संबंधित व्यक्तीने याबाबत बंगलोर पोलीसांना माहिती दिली. यावेळी राकेश खेडेकर याने सातारा जिल्ह्यातील धनगरवाडी ता. खंडाळा गावच्या हद्दीत एक कंपनीसमोर असणाऱ्या महामार्गावर त्याने विषारी औषध प्राशन केले. यामुळे त्याला अत्यवस्थ वाटल्याने कारच्या बाहेर आला असता कंपनीमधून घरी निघालेल्या एका दुचाकीचालकाने विचारपूस केली. राकेश खेडेकर याने विषारी औषध प्राशन केल्याचे सांगितले असता दुचाकीस्वाराने शिरवळ येथील खाजगी रुग्णालयात त्याला आणले. सातारा पोलिसांची कामगिरी त्याठिकाणी शिरवळ पोलीस स्टेशनचे पोलीस अंमलदार तुषार कुंभार हे कामानिमित्त आले होते. यावेळी तुषार कुंभार यांनी चौकशी केली असता राकेश खेडेकर याने खूनाबद्दल माहिती दिली. याबाबतची माहिती तुषार कुंभार यांनी तात्काळ शिरवळ पोलीस स्टेशनचे पोलीस निरीक्षक यशवंत नलावडे, सहाय्यक पोलीस निरीक्षक महादेव शिंदे यांना दिली. त्यांनी सातारा पोलीस अधिक्षक समीर शेख,अपर पोलीस अधिक्षक डॉ. वैशाली कडुकर यांना याबाबतची माहिती दिली. पोलीस अधिक्षक समीर शेख यांनी सर्व सूत्रे हातात घेत कर्नाटकमधील बंगलोर पोलीसांशी संपर्क साधत खून प्रकरणी राकेश खेडेकर याला ताब्यात घेतल्याची माहिती दिली. दरम्यान, राकेश खेडेकर याला ताब्यात घेत शिरवळ पोलिसांनी तत्परता दाखवित नातेवाईकांना व बंगलोर पोलीसांना संपर्क साधत अधिक उपचारासाठी पुणे येथील ससून रुग्णालयात दाखल केले. सदरची कामगिरी ही पोलीस अधीक्षक सातारा समीर शेख, अपर पोलीस अधिक्षक डॉ. वैशाली कडूकर, फलटण उपविभागीय पोलीस अधिकारी राहुल धस यांचे मार्गदर्शनाखाली शिरवळ पोलीस स्टेशनचे पोलीस निरीक्षक यशवंत नलावडे, सहाय्यक पोलीस निरीक्षक महादेव शिंदे, पोलीस अंमलदार तुषार कुंभार, नितीन नलावडे, प्रशांत धुमाळ, सुनील मोहरे, दिपक पालेपवाड यांनी केली आहे.
