Pune News | सध्या पुणे शहारासह राज्यात दीनानाथ मंगेशकर रुग्णालयात गर्भवती महिलेला वेळेत उपचार न मिळाल्याने तिचा मृत्यू झाल्याचे प्रकरण चर्चेत आहे. या प्रकरणाचा सर्व स्तरातून निषेध नोंदविला जात आहे. पुणे शहरातील विविध संघटनांनी मंगेशकर रुग्णालयाबाहेर आंदोलन करीत घटनेचा तीव्र शब्दांत निषेध नोंदवित रुग्णाालय प्रशासनावर कारवाईची मागणी केली आहे. मुख्यमंत्री देवेंद्र फडणवीस यांनी देखील या प्रकरणाची दखल घेतली असून, प्रकरणाची चौकशी करण्यासाठी समिती गठित केली आहे. या समितीने आपला प्राथमिक अहवाल आरोग्य विभागाला सूपूर्त केला आहे. येत्या दोन दिवसांत या प्रकरणाचा सविस्तर चौकशी अहवाल समिती शासनाला सादर करणार आहे. चौकशी अहवालात जे दोषी आढळतील त्यांच्यावर कारवाई करणार असल्याचे मुख्यमंत्री देवेंद्र फडणवीस यांनी आदेश दिले आहेत. अशातच आता शिवसेना उबाठा गटाचे नेते यांनी दीनानाथ मंगेशकर रुग्णालयाच्या संचालक मंडळावर भाजप पदाधिकारी असल्याने कोणतीही कारवाई होणार नाही, असा आरोप केला आहे. त्यांच्या याआरोपावर आता भाजपचे खासदार मुरलीधर मोहोळ यांनी जोरदार प्रत्युत्तर दिले आहे. संजय राऊत यांना माध्यमांचे बूम दिसले की, उठसुट काहीही बोलतात, असा खोचक निशाणा मुरलीधर मोहोळ यांनी राऊत यांना लगावला आहे. या प्रकरणांमध्ये मुख्यमंत्री देवेंद्र फडणवीस यांनी चौकशी समिती नेमली आहे. या चौकशी समितीच्या अहवालानंतर दोषींवर कारवाई केली जाणार आहे. घडलेला प्रकार अतिशय गंभीर असून त्या कुटुंबासोबत आम्ही सगळे आहोत, अशी प्रतिक्रिया मोहोळ यांनी दिली आहे. समाजातील प्रत्येक स्तरांमधून झालेल्या घटनेचा निषेध करण्यात आला आहे. घडलेली घटना ही अतिशय दुर्दैवी असल्याने मुख्यमंत्र्यांनी या घटनेचे चौकशीचा आदेश तातडीने दिला आहे. घडलेली घटना ही चुकीची असून ज्या व्यक्तीची अथवा संस्थेची चुकी असेल त्याच्यावर कारवाई निश्चित केली जाईल. दुर्दैवी घटना झाली अशाच पद्धतीची घटना पुन्हा घडू नये याची देखील काळजी घेण्यात येईल, असेही मोहोळ यांनी म्हटले.
