पिंपरी – पिंपरी-चिंचवड शहरातील अनधिकृत जाहिरात फलकांविरोधात महापालिकेच्या आकाशचिन्ह व परवाना विभागाने कारवाईची मोहीम सुरू केली आहे. चोवीसावाडी येथील काळीभिंत रोडवरील अनधिकृत ३० बाय ३० फुटांचा जाहिरात फलक लोखंडी स्ट्रक्चरसह महापालिकेने निष्कासित केला.

महापालिकेच्या हद्दीत खासगी जागेवरही जाहिरात फलक उभारण्यासाठी महापालिकेची पूर्वपरवानगी घेणे बंधनकारक आहे. महाराष्ट्र महानगरपालिका अधिनियमातील नियम २४४, २४५ तसेच महाराष्ट्र महानगरपालिका (आकाशचिन्ह व स्कायसाईन) व जाहिरात प्रदर्शित करण्याचे नियमन व नियंत्रण नियम २०२२ मधील तरतुदींनुसार ही परवानगी आवश्यक आहे.

शहराचे विद्रुपीकरण रोखण्याबरोबरच महापालिकेच्या जाहिरात महसुलात वाढ करण्यासाठी अनधिकृत जाहिरात फलकांविरोधात स्थळ पाहणी करून ते तातडीने हटविण्याची कारवाई सुरू करण्यात आली आहे. मागील महिन्यात ताथवडे येथील अनधिकृत जाहिरात फलक तसेच थरमॅक्स चौकातील एका बँकेच्या इमारतीवरील अनधिकृत जाहिरात फलकही निष्कासित करण्यात आले आहेत.

चोवीसावाडी येथील सर्व्हे क्रमांक १७५/९, काळीभिंत रोड येथे ३० बाय ३० फुटांचा जाहिरात फलक अनधिकृतपणे उभारण्यात आल्याचे महापालिकेच्या निदर्शनास आले. त्यानंतर आकाशचिन्ह व परवाना विभागाने उपआयुक्त राजेश आगळे यांच्या मार्गदर्शनाखाली कारवाई करत हा फलक लोखंडी स्ट्रक्चरसह हटविला.

दरम्यान, महापालिकेने शहरातील सर्व जाहिरात एजन्सींना अनधिकृत जाहिरात फलक उभारू नयेत, असा इशारा दिला आहे. यापुढे अनधिकृत फलक आढळल्यास ते कोणतीही पूर्वसूचना न देता तातडीने निष्कासित करण्यात येतील, असे महापालिकेने स्पष्ट केले आहे.

Satara: साक्षरतेच्या प्रकाशाने उजळतोय सातारा; जिल्ह्यात ‘उल्लास साक्षरता पंधरवडा’ उत्साहात