Mumbai-Pune Expressway: मुंबईसह पुण्यात मागील तीन-चार दिवसांपासून सुरू असलेले पावसाने जनजीवन विस्कळीत झाले आहे. मुंबईसह पुण्यातही भारतीय हवामान विभागाने पावसाचा अलर्ट जारी केला. या मुसळधार पावसाचा फटका मुंबई-पुणे एक्स्प्रेस वेला बसला असून, वाहतूक ठप्प झाली आहे.

मिसिंग लिंकजवळ दरड कोसळल्याने खबरदारीचा उपाय म्हणून दोन्ही बाजूंची वाहतूक पुढील आदेशापर्यंत पूर्णपणे बंद करण्यात आली आहे. पुण्याहून मुंबईला जाणाऱ्या लेनवर मिसिंग लिंकवरील दुसऱ्या बोगद्याच्या आधी दरड कोसळल्याने वाहतूक बंद झाली आहे.

सुदैवाने ही दरड कोसळत असताना कुठलंही वाहन त्या ठिकाणाहून जात नसल्याने मोठी दुर्घटना टळली. खबरदारी म्हणून मुंबईहून पुण्याकडे जाणारी लेन ही महामार्ग पोलिसांनी बंद केली आहे.जिल्हा प्रशासनाने नागरिकांना तूर्तास प्रवास न करण्याचे जाहीर आवाहन केले आहे.

 सुरक्षेचा उपाय म्हणून मार्ग बंद

पुणे-मुंबई एक्सप्रेसवेवरील ‘कनेक्टिंग लिंक’ आणि ‘मिसिंग लिंक’च्या दरम्यान एक काँक्रीटचा पिलर कोसळल्यामुळे या मार्गावरील वाहतूक पूर्णपणे ठप्प झाली आहे. दरड कोसळणे व सतत सुरू असलेल्या मुसळधार पावसामुळे जुन्या महामार्गावर काही ठिकाणी रस्त्यावरून पाणी वाहत आहे. त्यामुळे सुरक्षेचा उपाय म्हणून हा मार्गही बंद करण्यात आला आहे.

मावळ आणि ताम्हिणी घाट परिसरात पूरसदृश परिस्थिती निर्माण झाली आहे. पुणे-मुंबईला जोडणारे हे पर्यायी मार्गही पाण्याखाली गेल्यामुळे सध्या वाहतुकीसाठी पूर्णपणे बंद करण्यात आले आहेत.

मुंबई–पुणे रेल्वे मार्गावरील Tunnel No. 40 (BB EMD) येथे दरड कोसळली आहे. दरड हटविण्याचे काम रेल्वे प्रशासनाकडून युद्धपातळीवर सुरू असून, मार्ग पूर्ववत करण्यासाठी यंत्रणा कार्यरत आहे. मुसळधार पावसामुळे मुंबई–पुणे रेल्वे वाहतुकीवर परिणाम झाला असून, काही गाड्या रद्द तसेच वळविण्यात आल्या आहेत. प्रवाशांनी प्रवासापूर्वी आपल्या गाडीची स्थिती तपासूनच प्रवास करावा, असे आवाहन नागरिकांना करण्यात आले आहे.

रेल्वे सेवा विस्कळीत

मुसळधार पावसामुळे रेल्वे वाहतुकीवर मोठा परिणाम झाला आहे. दक्षिण-पूर्व विभागातील ठाकूरवाडी आणि मंकी हिल स्थानकादरम्यान दरड कोसळल्याने रेल्वे मार्ग बाधित झाला आहे.

या घटनेनंतर मध्य रेल्वेने तातडीने ६ जुलै रोजी धावणाऱ्या एकूण १४ रेल्वे गाड्या रद्द करण्याचा निर्णय घेतला आहे. यामध्ये मुंबई–पुणे, पुणे–मुंबई, पुणे–सोलापूर आणि सीएसएमटी–धारवाडसह अनेक महत्त्वाच्या गाड्यांचा समावेश आहे. प्रवाशांनी रेल्वे स्थानकावर जाण्यापूर्वी आपल्या गाडीची स्थिती तपासूनच प्रवासाचे नियोजन करावे, असे आवाहन रेल्वे प्रशासनाने केले आहे.

पुणे-मुंबई रेल्वे कॉरिडॉरलाही या पावसाचा मोठा फटका बसला आहे. मध्यरात्री ३:०५ वाजण्याच्या सुमारास कर्जत-लोणावळा दरम्यानच्या भोर घाट सेक्शनमधील ठाकुरवाडी जवळ पहिली दरड कोसळली. यानंतर काही वेळातच खंडाळा आणि मंकी हिल दरम्यान दुसरी दरड कोसळल्याची माहिती मध्य रेल्वेच्या अधिकाऱ्यांनी दिली आहे.

रेल्वे रुळांवर मोठे दगड आणि माती आल्याने मुंबई-पुणे रेल्वे सेवा पूर्णपणे विस्कळीत झाली असून, अनेक गाड्या रद्द करण्यात आल्या आहेत, तर काहींचे मार्ग वळवण्यात आले आहेत. Mumbai-Pune Expressway

हेही वाचा: 

Teachers BLO Duty: शिक्षकांना मोठा दिलासा! बीएलओ कामाबाबत राज्य निवडणूक अधिकाऱ्यांचा मोठा निर्णय