Mumbai Local Train : मुंबईतील लोकल ट्रेनच्या महिलांच्या डब्यात बुरखा घालून प्रवास करणाऱ्या ५७ वर्षीय पुरूषाला नाशिक येथून अटक करण्यात आली आहे. आरोपीची ओळख शेख अल्ताफ हुसेन इशाक अशी आहे. ही घटना ६ फेब्रुवारी रोजी घाटकोपर रेल्वे स्थानकावर (Mumbai Local Train ) घडली होती. दुसऱ्या दिवशी सोशल मीडियावर या प्रकाराचा चित्रफित व्हायरल झाली. कोणत्याही महिला प्रवाशाने कोणतीही औपचारिक तक्रार दाखल केली नसली तरी, रेल्वे पोलिसांनी (जीआरपी) हे प्रकरण गांभीर्याने घेतले आणि तपास सुरू केला. मुंबई जीआरपी पथकाने सीसीटीव्ही फुटेजचे सखोल विश्लेषण केल्यानंतर तो नाशिकमधील मुक्तिधाम परिसरात सापडला. घाटकोपर आणि ठाणे स्थानकांमधील सीसीटीव्ही फुटेजमध्ये संशयित ६ फेब्रुवारी रोजी ठाणे येथे पाटलीपुत्र एक्सप्रेसच्या जनरल डब्यातून उतरताना दिसत होता. इगतपुरी आणि नाशिक रोड स्थानकांवरून मिळालेल्या अतिरिक्त फुटेजमध्ये नंतर तो बुरखा घालून नाशिक रोड स्थानकावर कुंपणवरून उडी मारताना दिसला. चौकशीदरम्यान, इशाकने अस्पष्ट उत्तरे दिली. त्यानंतर त्याच्या घराची झडती घेतली असता फुटेजमध्ये दिसणारे बूट आणि बॅग सापडली. त्याच्या कुटुंबाने त्याची ओळख पटवून दिली. इशाक स्किझोफ्रेनियाने ग्रस्त आहे आणि त्याच्यावर संभाजी नगर येथील मानसिक रुग्णालयात उपचार सुरू आहेत. त्याच्या वैद्यकीय स्थितीमुळे तो अधूनमधून भटकत असल्याचे पोलिसांनी सांगितले.
