MSRTC : तृतीयपंथीयांना सार्वजनिक ठिकाणी स्वच्छतागृह वापरताना अनेक अडचणींचा सामना करावा लागतो. ही अडचण दूर करण्यासाठी राज्य सरकारने महत्त्वाचा निर्णय घेतला आहे. महाराष्ट्र राज्य मार्ग परिवहन महामंडळाच्या (एसटी) विविध बसस्थानकांवर तृतीयपंथीयांसाठी स्वतंत्र स्वच्छतागृहे उभारण्यात येणार आहेत.

मुंबई, पुणे, अमरावती, नागपूर, छत्रपती संभाजीनगर आणि नाशिकसह राज्यातील विविध विभागांमधील बसस्थानकांचा या योजनेत समावेश आहे. यासाठी ९ कोटी ७३ हजार १९५ रुपयांच्या अंदाजपत्रकाला प्रशासकीय मान्यता देण्यात आली आहे.

मराठवाड्यातील धाराशिव, परभणी, बीड, नांदेड तसेच विदर्भातील भंडारा आणि यवतमाळ विभागांचाही यात समावेश आहे. प्रत्येक स्वच्छतागृह सुमारे सहा चौरस मीटरचे असेल. पाणीपुरवठा, सांडपाणी व्यवस्था आणि वीजजोडणीसह एका युनिटसाठी सुमारे २.४ लाख रुपये खर्च अपेक्षित आहे.

काम सुरू करण्यापूर्वी सविस्तर अंदाजपत्रक, कार्यकारी अभियंत्यांची तांत्रिक मान्यता आणि वास्तुविशारदांची मंजुरी घेणे बंधनकारक करण्यात आले आहे. हा खर्च तृतीयपंथीय कल्याण मंडळासाठी मंजूर निधीतून केला जाणार आहे.
दरम्यान, १ जून २०२६ पासून एसटीच्या सर्व स्वच्छतागृहांचा वापर प्रवाशांसाठी मोफत करण्यात आला आहे.