विसर्जन मिरवणुकीमुळे आज पर्यायी मार्गांवरून सुटणार बसेस

Bus Station: गणेश विसर्जन मिरवणुकीमुळे शुक्रवारी स्वारगेट आणि डेक्कन चौक परिसर बस वाहतुकीसाठी बंद राहणार आहे. तरी प्रवाशांची गैरसोय टाळण्यासाठी पीएमपीएमएलने बसस्थानकांचे तात्पुरते स्थलांतर केले असून, या दिवशी कात्रज- कोंढवाकडे जाणाऱ्या बसेस लक्ष्मी नारायण चौक, सिंहगड रोडच्या बसेस पर्वती पायथा, हडपसरच्या बसेस वेगा सेंटर, तर कोथरूड- एनडीएकडे जाणाऱ्या बसेस एसएनडीटी कॉलेजजवळून सुटतील.

अनंत चतुर्दशीच्या गणेश विसर्जन मिरवणुकीच्या पार्श्वभूमीवर प्रवाशांच्या सोयीसाठी स्वारगेट आणि डेक्कन परिसरातील बसस्थानकांमध्ये हे तात्पुरते बदल केले आहेत. विसर्जनाच्या दिवशी शहरातील शिवाजी रोड, बाजीराव रोड, लक्ष्मी रोड, टिळक रोड आणि कर्वे रोड हे प्रमुख मार्ग बस वाहतुकीसाठी पूर्णपणे बंद राहतील.

या मार्गांवरील बसेसचे संचालन मूळ स्थानकांऐवजी खालील पर्यायी ठिकाणांवरून सुरू राहील. त्यामध्ये शाहू महाराज बसस्थानक (स्वारगेट) येथील बसस्थानक लक्ष्मी नारायण चौक येथे असेल. येथून सातारा रोडने कात्रज, कोंढवा, अप्पर, मार्केट यार्डकडे बस सुटतील. नटराज बसस्थानक येथून सिंहगड रोडकडे जाणाऱ्या सर्व बसेस पर्वती पायथा (स्वामी समर्थ मठ) बस थांब्यावरून सुटतील.

स्वारगेट स्थानकाबाहेर (पूलगेट, हडपसर, भवानी पेठ, नाना पेठ, रास्ता पेठ) : सोलापूर रोड व पेठांमध्ये जाणाऱ्या सर्व बसेस वेगा सेंटर (स्वारगेट डेपो जवळ) येथून धावतील.

डेक्कन जिमखाना बसस्थानकातून कोथरूड डेपो, माळवाडी, एनडीए गेटकडे जाणाऱ्या बसेस एसएनडीटी कॉलेज येथून सुटतील. प्रवाशांनी या तात्पुरत्या बदलांची नोंद घ्यावी आणि पीएमपी प्रशासनाला सहकार्य करावे, असे आवाहन पीएमपीने केले आहे.