Ramdas Athawale : देशभरात सध्या आरक्षणाच्या मुद्द्यावरून तीव्र चर्चा सुरू असतानाच, केंद्रीय सामाजिक न्याय राज्यमंत्री रामदास आठवले (Ramdas Athawale) यांनी एक अत्यंत धक्कादायक आणि मोठे विधान केले आहे.

मोदी यांच्या मंत्रिमंडळातील प्रमुख दलित चेहरा म्हणून ओळखल्या जाणाऱ्या आठवले (Ramdas Athawale) यांनी थेट आरक्षण सोडण्याची तयारी दर्शवली असून, त्यासाठी त्यांनी एक अत्यंत महत्त्वाची अट समोर ठेवली आहे. त्यांच्या या विधानामुळे राजकीय आणि सामाजिक वर्तुळात मोठी खळबळ उडाली आहे.

छत्तीसगडची राजधानी रायपूर येथे पत्रकारांशी संवाद साधताना त्यांनी ही भूमिका स्पष्ट केली. भारतीय राज्यघटनेत आरक्षण हे जातीच्या आधारावर देण्यात आले आहे, याची आठवण करून देत ते म्हणाले की, समाजात जोपर्यंत जातिवाद जिवंत आहे, तोपर्यंत आरक्षण व्यवस्था कायम राहणे गरजेचे आहे.

जर देशातून जातिवाद आणि जातीय विषमता पूर्णपणे संपली, तर आम्ही स्वतःहून आरक्षण सोडण्यास तयार आहोत; परंतु जोवर ही विषमता नष्ट होत नाही, तोवर आरक्षणाला हात लावता येणार नाही. विशेष म्हणजे, गेल्याच आठवड्यात झारखंडमधील रांची येथेही त्यांनी अशाच स्वरूपाचे वक्तव्य करून देशातील जातिव्यवस्थेवर बोट ठेवले होते.

राजधानी दिल्लीत आरक्षण व्यवस्थेविरोधात झालेल्या तीव्र आंदोलनांच्या पार्श्वभूमीवर आठवले यांचे हे विधान समोर आल्याने त्याला वेगळेच महत्त्व प्राप्त झाले आहे. ऑगस्ट महिन्यात दिल्लीतील जंतर-मंतरवर आरक्षणाच्या विरोधात मोठे आंदोलन छेडण्यात आले होते.

या आंदोलनात जातीऐवजी आर्थिक निकषांवर आरक्षण लागू करण्याची मागणी करण्यात आली होती, तसेच समाजमाध्यमांवरही ‘आरक्षण हटाओ आंदोलन’ ही मोहीम जोरात चालवली गेली. त्या वेळी पोलिसांनी ५० हून अधिक आंदोलकांना ताब्यातही घेतले होते. दिल्लीतील या वाढत्या विरोधाला आता आठवले (Ramdas Athawale) यांनी अत्यंत रोखठोक शब्दांत उत्तर दिल्याचे मानले जात आहे.