ST recruitment : महाराष्ट्र राज्य मार्ग परिवहन महामंडळात (एसटी) लवकरच सुमारे १३ हजार ९८० चालक आणि यांत्रिकी कर्मचाऱ्यांची कंत्राटी पद्धतीने भरती करण्यात येणार आहे. ही भरती प्रक्रिया पारदर्शक आणि नियमांनुसार राबवावी, असे निर्देश परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिले आहेत.

एसटीच्या नावाचा वापर करून काही खासगी संस्था बेरोजगार तरुणांना नोकरीचे आमिष दाखवत पैसे उकळत असल्याच्या तक्रारी समोर आल्या आहेत. नोकरीच्या अपेक्षेने या संस्थांवर विश्वास ठेवणाऱ्या तरुणांची आर्थिक फसवणूक होत आहे. त्यामुळे अशा प्रकारांना आळा घालण्याची गरज असल्याचे सरनाईक यांनी सांगितले.

एसटी महामंडळाच्या सुरक्षा आणि दक्षता विभागाने या प्रकरणांची सखोल चौकशी करावी. फसवणूक करणाऱ्या खासगी संस्था आणि संबंधित व्यक्तींची ओळख पटवून दोषींवर गुन्हे दाखल करावेत, असे आदेश त्यांनी दिले आहेत.

भरती प्रक्रियेत उमेदवारांची निवड महामंडळाने ठरवलेल्या पात्रता निकषांनुसारच करावी. कोणत्याही उमेदवाराची फसवणूक होणार नाही, याची दक्षता प्रशासनाने घ्यावी, असेही मंत्र्यांनी स्पष्ट केले. नोकरीच्या नावाखाली पैसे उकळणाऱ्यांची गय केली जाणार नसल्याचा इशाराही त्यांनी दिला आहे. या भरती प्रक्रियेला आता वेग आला आहे.