MPSC Update – महाराष्ट्र लोकसेवा आयोगातर्फे (एमपीएससी) घेतल्या जाणाऱ्या राज्य सेवा मुख्य परीक्षा-२०२५ च्या वेळापत्रकात महत्त्वपूर्ण बदल करण्यात आला आहे. २७ फेब्रुवारी रोजी प्रसिद्ध केलेल्या मूळ अधिसूचनेनुसार ही परीक्षा २९ मार्चपासून सुरू होणार होती. मात्र, आता ती ५ एप्रिल २०२६ पासून सुरू होणार आहे. परीक्षेच्या पूर्वतयारीसाठी वेळ वाढवून मिळावा, या उमेदवारांच्या मागणीची दखल घेत आयोगाने हे सुधारित वेळापत्रक प्रसिद्ध केले आहे. आयोगाने गुरुवारी प्रसिद्ध केलेल्या शुद्धिपत्रकानुसार, राज्य सेवा मुख्य परीक्षेचे आयोजन आता एप्रिल आणि मे महिन्यातील विविध सत्रांमध्ये केले जाईल. परीक्षेची सुरुवात रविवारी, ५ एप्रिल रोजी भाषा पेपर क्रमांक १ आणि २ ने होईल. त्यानंतर १८ एप्रिल रोजी निबंधाचा पेपर, तर १९ एप्रिल रोजी सामान्य अध्ययन १ आणि २ चे पेपर होतील. २६ एप्रिल रोजी सामान्य अध्ययन ३ आणि ४ चे पेपर घेतले जातील. परीक्षेचा शेवटचा टप्पा मे महिन्यात असून, २ मे रोजी वैकल्पिक विषय पेपर क्रमांक ८ आणि १० मे रोजी वैकल्पिक विषय पेपर क्रमांक ९ ची परीक्षा पार पडेल. दरम्यान, केवळ परीक्षेच्या तारखांमध्ये बदल करण्यात आल्यामुळे आता उमेदवारांना सरावासाठी अतिरिक्त वेळ मिळाला आहे. सराव, मॉक टेस्टला मिळाला वेळ नवीन अभ्यासक्रम आणि विषयांची व्याप्ती पाहता जुन्या वेळापत्रकानुसार उजळणीसाठी पुरेसा वेळ मिळत नव्हता. आता परीक्षेच्या तारखा थोड्या पुढे गेल्यामुळे आम्हाला शेवटच्या टप्प्यातील सराव आणि मॉक टेस्ट सोडविण्यासाठी अतिरिक्त १०-१५ दिवस मिळाले आहेत. यामुळे नक्कीच आमचा आत्मविश्वास वाढेल आणि परीक्षेला सामोरे जाणे सोपे होईल, अशी प्रतिक्रिया नितीन आंधळे यांनी दिली.
