MPSC Success :  महाराष्ट्र लोकसेवा आयोग (MPSC) परीक्षेत यश मिळवत नेवासे येथील त्रिमूर्ती पावन प्रतिष्ठान संचलित श्री दादासाहेब हरिभाऊ घाडगे पाटील माध्यमिक व उच्च माध्यमिक विद्यालयाचे माजी विद्यार्थी प्रकाश कुशाहरी शिंदे यांची महाराष्ट्र शासनाच्या सहाय्यक राज्यकर आयुक्त पदावर निवड झाली आहे.

या निवडीच्या निमित्ताने त्रिमूर्ती पावन प्रतिष्ठानच्या वतीने शिंदे यांचा सत्कार व विद्यार्थ्यांसाठी मार्गदर्शन कार्यक्रम आयोजित करण्यात आला. यावेळी त्यांनी महाराष्ट्र लोकसेवा आयोगाच्या परीक्षेच्या तयारीतील अनुभव, अभ्यासाचे नियोजन, आलेल्या अडचणी आणि त्यांवर मात करण्याबाबत विद्यार्थ्यांशी संवाद साधला.

कार्यक्रमात संस्थेच्या उपाध्यक्षा ॲड. स्नेहल चव्हाण पाटील यांच्या हस्ते त्यांचा सत्कार करण्यात आला. यावेळी प्राचार्य सोपान काळे, निवासी प्राचार्य एकनाथ कापसे, उपप्राचार्य शांतीलाल मेहेत्रे, माजी विद्यार्थी महेश शिंदे, कुशाहरी शिंदे, विभागप्रमुख बाळासाहेब साबळे, जितेंद्र पाटील, नामदेव ताके, मिलिंद सोनवणे, बाबासाहेब तांबे, शिक्षक, पालक व विद्यार्थी उपस्थित होते. कार्यक्रमाचे सूत्रसंचालन लक्ष्मण दळे यांनी केले, तर आभार प्रदर्शन महेश शिंदे यांनी मानले.

कार्यक्रमाच्या शेवटी संस्थेच्या पदाधिकाऱ्यांनी प्रकाश शिंदे यांचे अभिनंदन करून त्यांच्या पुढील प्रशासकीय कारकिर्दीस शुभेच्छा दिल्या. तसेच त्यांच्या यशामागे शाळेतील शिक्षकांच्या मार्गदर्शनाचे योगदान असल्याचा उल्लेख करण्यात आला.