Pune | पुण्यात काल दि. ११ रोजी रात्री एमपीएसीच्या विद्यार्थ्यांनी शास्त्री रस्त्यावर आंदोलन केले. राज्यसेवा २०२४ मुख्य परीक्षेसाठी वेळ वाढवून देण्याच्या मागणीसाठी विद्यार्थी रस्त्यावर उतरले होते. केवळ १७ दिवसांच्या अंतराने शासनाकडून दुसरा पेपर घेतला जात असल्याचा आरोप विद्यार्थ्यांकडून करण्यात आला असून, यासाठी विद्यार्थ्यांनी आंदोलन केले.

या आंदोलनाची माहिती पोलिसांना मिळताच पोलिसांनी घटनास्थळी धाव घेतली. पोलिसांनी विद्यार्थ्यांची समजूत काढण्याचा प्रयत्न केला. मात्र, विद्यार्थी आपल्या मागण्यांवर ठाम होते. यावेळी पोलिस आणि विद्यार्थ्यांमध्ये शाब्दिक चकमक देखील झाली. काही वेळानंतर  विद्यार्थ्यांनी आंदोलन थांबवले.

आज आंदोलक विद्यार्थ्यांनी देशाचे माजी कृषीमंत्री शरद पवार यांची पुण्यातील मोदी बाग येथील निवासस्थानी जात भेट घेतली. रात्रीच्या आंदोलनानंतर आज सकाळी विद्यार्थी त्यांच्या मागण्या घेऊन शरद पवारांच्या भेटीसाठी आले होते. शरद पवारांसोब विद्यार्थ्यांनी अर्ध्या तास संबंधित विषयावर चर्चा केली.

त्यानंतर शरद पवारांनी विद्यार्थ्यांसमोरच थेट महाराष्ट्र लोकसेवा आयोगाच्या अध्यक्षांना फोन केला. आयोगाचे अध्यक्ष रजनीश शेठ यांच्याशी त्यांनी यासंबंधी विद्यार्थ्यांचे म्हणणे शेठ यांना सांगितले. त्यानंतर विद्यार्थ्यांना भेटीसाठीची वेळ रजनीश शेठ यांनी दिली आहे. विद्यार्थ्यांचे सर्व प्रश्न मार्गी लावू असे आश्वासन रजनीश शेठ यांनी शरद पवारांना फोनवरुन दिले असल्याची माहिती आहे.