Omraje Nimbalkar : शिवसेना (उद्धव बाळासाहेब ठाकरे) पक्षातील खासदारांच्या बंडानंतर सर्वाधिक चर्चेत असलेले खासदार ओमराजे निंबाळकर यांच्या पुढील राजकीय भूमिकेकडे संपूर्ण राज्याचे लक्ष लागले आहे. मतदारसंघातील कार्यकर्ते आणि पदाधिकाऱ्यांसोबत सुरू असलेल्या बैठकीनंतर आता त्यांच्या शिंदे गटात जाण्याच्या चर्चांना अधिक बळ मिळाले आहे. मात्र, अद्याप ओमराजे निंबाळकर यांनी कोणताही अधिकृत निर्णय जाहीर केलेला नाही. (Omraje Nimbalkar)

विकासासाठी सत्तेत जा, कार्यकर्त्यांची स्पष्ट भूमिका

भूम-परांडा मतदारसंघातील पदाधिकाऱ्यांसोबत झालेल्या बैठकीनंतर काही पदाधिकाऱ्यांनी माध्यमांशी संवाद साधताना सांगितले की, मतदारसंघाच्या विकासासाठी ओमराजे निंबाळकर यांनी सत्तेत सहभागी व्हावे, अशी भूमिका बैठकीत मांडण्यात आली. या मागणीला खासदारांनी सकारात्मक प्रतिसाद दिल्याचा दावा पदाधिकाऱ्यांनी केला आहे. यामुळे ओमराजे निंबाळकर हे शिवसेना शिंदे गटात जाण्याची शक्यता अधिक चर्चेत आली आहे. (Omraje Nimbalkar)

ठाकरे गटाशीही संपर्क कायम

दुसरीकडे, ओमराजे निंबाळकर यांनी अद्याप ठाकरे गटाशी संपर्क तोडलेला नसल्याची माहिती समोर आली आहे. पुण्यात ठाकरे गटाचे नेते कैलास पाटील आणि अरविंद सावंत यांचे निकटवर्तीय वरुण सरदेसाई यांनी त्यांची भेट घेतल्याची चर्चा आहे. या भेटीत सध्याच्या राजकीय घडामोडी आणि त्यांच्या पुढील भूमिकेबाबत चर्चा झाल्याचे सांगितले जात आहे. (Omraje Nimbalkar)

निर्णयाकडे राज्याचे लक्ष

शिवसेना ठाकरे गटातील सहा खासदारांच्या बंडाच्या पार्श्वभूमीवर ओमराजे निंबाळकर यांचा निर्णय अत्यंत महत्त्वाचा मानला जात आहे. कारण त्यांनी जर ठाकरे गटातच राहण्याचा निर्णय घेतला, तर दोन-तृतीयांश संख्याबळाचा प्रश्न निर्माण होऊन इतर बंडखोर खासदारांच्या राजकीय अडचणी वाढू शकतात, अशी चर्चा राजकीय वर्तुळात सुरू आहे. (Omraje Nimbalkar)

मंत्रिपदाच्या चर्चांनाही उधाण

गोवर्धनवाडी येथील ओमराजे निंबाळकर यांच्या निवासस्थानी कार्यकर्त्यांची मोठी गर्दी झाली आहे. तालुकानिहाय बैठकीत अनेक कार्यकर्त्यांनी “जिल्ह्याच्या विकासासाठी जो निर्णय घ्याल, त्यामागे आम्ही ठामपणे उभे आहोत,” अशी भूमिका व्यक्त केली. (Omraje Nimbalkar)

काही कार्यकर्त्यांनी तर ओमराजे निंबाळकर यांना भविष्यात मंत्रिपद मिळावे, अशी अपेक्षाही व्यक्त केली आहे. यापूर्वी बंडखोर खासदारांपैकी एका खासदाराला मंत्रिपदाचे आश्वासन देण्यात आल्याची राजकीय चर्चा रंगली होती. मात्र, याबाबत कोणतीही अधिकृत घोषणा झालेली नाही. (Omraje Nimbalkar)