जळोची : आगामी विधानसभा निवडणुकीच्या पार्श्वभूमीवर बारामती दौऱ्यावर असणाऱ्या खासदार निलेश लंके यांनी नगर जिल्ह्या बाबत मोठं विधान केलं आहे. लंके म्हणाले की, ‘आगामी विधानसभा निवडणुकीत संपूर्ण नगर जिल्ह्यातून महाविकास आघाडीचे उमेदवार निवडून येतील’ असा विश्वास त्यांनी बारामतीत माध्यमांशी बोलताना व्यक्त केला.

खासदार लंके आज बारामती दौऱ्यावर होते. राष्ट्रवादी काँग्रेस पक्ष शरदचंद्र पवार पक्षाचे अध्यक्ष शरद पवार यांच्या हस्ते निलेश लंके प्रतिष्ठान संचलित शरदचंद्र पवार आरोग्य रथाचा लोकार्पण सोहळा पार पडला. यावेळी खासदार निलेश लंके ही उपस्थित होते.

पुढे बोलताना लंके की म्हणाले की, नगर दक्षिण मध्ये सगळ्याच्या सगळ्या जागा निवडून आणण्याचा महाविकास आघाडीचा मनोदय आहे. अनेक जण इच्छुक आहेत मात्र महाविकास आघाडीतील प्रमुख जे निर्णय घेतील. या चर्चांना महत्त्व आहे. असेही यावेळी लंके म्हणाले.

राष्ट्रवादी काँग्रेस पक्षात फूट पडल्यानंतर विधानसभा निवडणुकीच्या पार्श्वभूमीवर उपमुख्यमंत्री अजित पवारांकडे गेलेले आमदार पुन्हा शरद पवार गटाकडे जाण्याची शक्यता वर्तवली जात आहे. या प्रश्नावर बोलताना लंके म्हणाले की, ‘हा विषय वरिष्ठ पातळीवरील आहे. या विषयावर माझ्यासारख्या छोट्या कार्यकर्त्यांनी बोलणं उचित नाही’. अशी प्रतिक्रिया त्यांनी दिली.

महाविकास आघाडीतील मित्र पक्षांकडून अनेक जागांवर दावा केला जातोय. यावरून आघाडीत बिघाडी होण्याची शक्यता वर्तवली जात आहे. या प्रश्नावर बोलताना लंके म्हणाले की, महाविकास आघाडीत कोणतीही बिघाडी होणार नाही.

कोणत्या पातळीवर कोणती चर्चा चालते याला महत्व नसून, महाविकास आघाडीचे शरद पवार, उद्धव ठाकरे, बाळासाहेब थोरात, नाना पटोले हे प्रमुख एका विचाराने चालतात. त्यामुळे कुठेही बिघाडी होणार नाही. असे त्यांनी सांगितले.

ज्याच्या विरोधात निवडणूक लढवतो त्याच्याशी हात मिळवणी करत नाही. माजी खासदार (सुजय विखे पाटील) यांच्याशी कधी भेट होते का? असा प्रश्न पत्रकारांनी केला असता.

लंके म्हणाले की, राजकीय जीवनामध्ये माजी आणि त्यांची भेट झाली नाही. आणि या पुढील कालखंडातही होणार नाही. निलेश लंके ज्याच्या विरोधात निवडणूक लढवतो त्याच्याशी कधीही हात मिळवणी करत नाही. असंही खासदार निलेश लंके यावेळी म्हणाले.