पुणे : घटस्फोटाचा दावा सुरू असताना वडिलांकडे असलेल्या सात वर्षीय मुलाशी आता आईला बोलता येणार आहे. दर शनिवारी आणि रविवारी एक तास मुलाशी व्हिडीओ कॉल अथवा मोबाईल कॉलद्वारे बोलण्यास परवानगी दिली आहे. कौटुंबिक न्यायालयाचे न्यायाधीश एन.आर.नाईकवाडे यांनी याबाबतचा आदेश दिला आहे. अर्जंट असल्याने लॉकडाऊनमध्ये व्हिडीओ कॉन्फरसिंगद्वारे या प्रकरणामध्ये सुनावणी झाली.

माधव आणि माधवी (नावे बदललेली) अशी त्या दोघांची नावे आहेत. माधवी यांच्या वतीने ऍड. जयपाल पाटील आणि ऍड. दिग्विजय ठोंबरे यांनी बाजू मंडली. माधव-माधवी विभक्त राहत असून, घटस्फोटाचा दावा काही वर्षांपासून प्रलंबित आहे. माधव व्यावसायिक आहे. तर, माधवी सरकारी नोकरी करते. दोघांना मुलगा आहे. तो माधवकडे आहे. माधव तिला मुलाशी बोलू देत नव्हता. या पार्श्‍वभूमीवर माधवीने 3 फेब्रुवारी 2020 रोजी मुलाला भेटण्यास परवानगी देण्यात यावी, असा अर्ज न्यायालयात केला.

त्यानंतर करोनाच्या पार्श्‍वभूमीवर लॉकडाऊन सुरू झाले. त्यामुळे यावरील सुनावणी लांबली. दरम्यान अर्जंट असल्याने यावर सुनावणी करण्यात आली. मुलाला दर शनिवारी आणि रविवारी भेटण्यास परवानगी देण्याची मागणी अर्जात करण्यात आली होती. मात्र, करोनाच्या पार्श्‍वभूमीवर शनिवारी आणि रविवारी प्रत्येकी एक तास फोनवर बोलण्यास परवानगी देण्यात आली आहे.

याविषयी ऍड. जयपाल पाटील म्हणाले, आईला मुलाला भेटण्याचा, बोलण्याचा नैसर्गिक अधिकार आहे. इथे पतीने बोलण्यास प्रतिबंध घातल्याने न्यायालयात जावे लागले. यावर सुनावणी करत मुलाला भेटण्यास न्यायालयाने परवानगी दिल्याने अर्जदार महिलेला आनंद झाला आहे.