Moshi Garbage Depot Accident – मोशी कचरा डेपोतील भीषण दुर्घटनेत नऊ कामगारांचा मृत्यू झाल्यानंतर या प्रकरणाची श्वेतपत्रिका जाहीर करून उच्चस्तरीय चौकशी करण्यात यावी. तसेच दुर्घटनेस जबाबदार असलेल्या अधिकारी आणि संबंधितांवर सदोष मनुष्यवधाचा गुन्हा दाखल करून कठोर कारवाई करावी, अशी मागणी शिवसेना पुणे जिल्हा संघटक संतोष सौंदणकर यांनी पिंपरी-चिंचवड महापालिका आयुक्त विजय सुर्यवंशी यांच्याकडे निवेदनाद्वारे केली आहे.

सौंदणकर यांनी निवेदनात म्हटले आहे की, वेस्ट टू एनर्जी प्रकल्पातील इमारत धोकादायक असल्याची माहिती प्रशासनाला पूर्वीपासून होती. असे असतानाही कामगारांना त्या इमारतीत काम करण्यास परवानगी का देण्यात आली, याचे उत्तर महापालिकेने जनतेसमोर मांडावे. तसेच मोशी डेपोमध्ये साचलेल्या कचऱ्याच्या पार्श्वभूमीवर बायोमायनिंगची कामे नेमकी किती आणि कुठे झाली, याची माहिती श्वेतपत्रिकेद्वारे जाहीर करण्यात यावी.

कचरा व्यवस्थापनासाठी कोट्यवधी रुपये खर्च करूनही अशी दुर्घटना घडणे हे प्रशासनाच्या निष्काळजीपणाचे परिणाम असल्याची टीका त्यांनी केली. मृत कामगारांच्या कुटुंबीयांना केवळ आर्थिक मदत जाहीर करून जबाबदारी संपत नाही, त्यांच्या मुलांचे शिक्षण, कुटुंबाचा उदरनिर्वाह आणि वृद्ध आई-वडिलांचा आधार याचाही शासनाने विचार करावा,

असेही त्यांनी नमूद केले.दुर्घटनेतील मृतांच्या कुटुंबीयांना भरीव आर्थिक मदत, जखमी कामगारांचा संपूर्ण वैद्यकीय खर्च आणि प्रत्येक कुटुंबातील एका पात्र वारसाला पिंपरी-चिंचवड महापालिकेत कायमस्वरूपी नोकरी देण्याची मागणीही सौंदणकर यांनी केली. दोषींवर कठोर कारवाई आणि पीडित कुटुंबांना न्याय मिळाल्याशिवाय हा विषय संपणार नाही, असा इशाराही त्यांनी दिला.