Top 10 News : 01) सुनेत्रा पवारांच्या अध्यक्षपदावर पक्षातूनच आक्षेप; कायदेशीर नोटीसमुळे राष्ट्रवादीत खळबळ

राष्ट्रवादी काँग्रेसमध्ये पुन्हा एकदा अंतर्गत वाद उफाळून आलाय. पक्षाच्या राष्ट्रीय अध्यक्षपदी सुनेत्रा पवार यांच्या निवडीला पक्षातीलच ज्येष्ठ नेते आणि राष्ट्रीय सचिव सच्चिदानंद सिंह यांनी कायदेशीर नोटीस पाठवत आक्षेप घेतलाय. 26 फेब्रुवारी रोजी झालेली राष्ट्रीय अध्यक्षपदाची निवडणूक अवैध असल्याचा दावा करत ती रद्द करून स्वतंत्र आणि निष्पक्ष निवडणूक अधिकाऱ्याच्या देखरेखीखाली पुन्हा निवडणूक घेण्याची मागणी नोटिशीत करण्यात आलीय. ही नोटीस सुनेत्रा पवार, कार्यकारी अध्यक्ष प्रफुल पटेल आणि सचिव ब्रिजमोहन श्रीवास्तव यांना पाठवण्यात आलीय. तसेच नव्या पदाधिकाऱ्यांची यादीही रद्द मानावी, अशी मागणी करण्यात आलीय. या घडामोडीमुळे राष्ट्रवादी काँग्रेसमध्ये पुन्हा एकदा राजकीय खळबळ उडाली असून पक्षातील अंतर्गत मतभेद चव्हाट्यावर आलेत. (Top 10 News)

02) तुकाराम मुंढेंच्या FDA ची ऑईल कंपनीवर धाड; पाम तेलासह 2 कोटी 93 लाखांचे खाद्यतेल जप्त

अन्न व औषध प्रशासन विभागाने छत्रपती संभाजीनगरमध्ये मोठी कारवाई करत दोन खाद्यतेल रिपॅकिंग युनिट्सवर धाड टाकून तब्बल 2 कोटी 93 लाख रुपयांचा संशयित निकृष्ट दर्जाचा खाद्यतेलाचा साठा जप्त केलाय. आयुक्त तुकाराम मुंढे यांच्या नेतृत्वाखाली सुरू असलेल्या ‘सेफ फूड, सेफ महाराष्ट्र’ मोहिमेअंतर्गत ही कारवाई करण्यात आली. तपासणीदरम्यान अस्वच्छ वातावरणात तेलाचे पॅकिंग, वापरलेले डबे पुन्हा वापरणे, फूड ग्रेड प्रमाणपत्रांचा अभाव, प्रयोगशाळा नसणे आणि तांत्रिक कर्मचाऱ्यांची नियुक्ती न केल्यासारख्या गंभीर त्रुटी आढळल्या. पाम, सोयाबीन, कपाशी आणि इतर वनस्पती तेलाचे नमुने तपासणीसाठी प्रयोगशाळेत पाठवण्यात आले असून दोन्ही आस्थापनांचे परवाने तात्काळ निलंबित करण्यात आलेत. FDAच्या या धडक मोहिमेमुळे भेसळखोरांमध्ये खळबळ उडालीय. (Top 10 News)

03) वारीत दुर्दैवी दुर्घटना! भरधाव ट्रकच्या धडकेत 3 महिला वारकरी ठार, 4 गंभीर जखमी

आषाढी वारीदरम्यान सासवड-जेजुरी मार्गावर सोमवारी सकाळी भीषण अपघात झाला. बेलसर टोलनाक्याजवळ भरधाव ट्रकने सात महिला वारकऱ्यांना जोरदार धडक दिल्याने तीन महिलांचा जागीच मृत्यू झाला, तर चार महिला गंभीर जखमी झाल्या. प्राथमिक माहितीनुसार, 70 वर्षीय ट्रक चालक ताप आणि सर्दीची औषधे घेत असताना वाहन चालवत होता. ओव्हरटेकच्या प्रयत्नात ट्रक अचानक डावीकडे वळल्याने हा अपघात घडल्याचा संशय आहे. मृत महिलांमध्ये नंदा पवार, माधवी सालगरे आणि राजश्री भोसले यांचा समावेश आहे. जखमींवर जेजुरीतील रुग्णालयात उपचार सुरू आहेत. घटनेनंतर पोलिसांनी घटनास्थळी धाव घेत पंचनामा आणि तपास सुरू केला आहे. उपमुख्यमंत्री सुनेत्रा पवार यांनीही जखमींची रुग्णालयात भेट घेऊन त्यांच्या प्रकृतीची विचारपूस केली. (Top 10 News)

04) माझं नाव माईकवर का घेतलं नाही? लग्नात तलाठ्याचा राडा

अहिल्यानगर जिल्ह्यातील जामखेड तालुक्यात एका लग्नसमारंभात धक्कादायक घटना घडलीय. माईकवर नाव पुकारले नाही, या कारणावरून तलाठी शिवाजी हजारे यांनी सूत्रसंचालक अशोक पठाडे यांना भर मंडपात मारहाण केल्याचा धक्कादायक प्रकार समोर आलाय. प्रथम शिवीगाळ आणि चापट मारल्यानंतर आरोपीने हातातील लोखंडी माईक हिसकावून थेट पठाडे यांच्या डोक्यात मारला. या हल्ल्यात सूत्रसंचालक गंभीर जखमी झाले असून त्यांना जामखेड ग्रामीण रुग्णालयात उपचारासाठी दाखल करण्यात आलेय. घटनेनंतर लग्नसमारंभात एकच गोंधळ उडाला. उपस्थितांनी मध्यस्थी करत वाद शांत केला. या प्रकरणी जामखेड पोलिसांनी आरोपी तलाठीविरुद्ध विविध कलमान्वये गुन्हा दाखल केला असून पुढील तपास सुरू आहे. सरकारी अधिकाऱ्याच्या या कथित वर्तनामुळे परिसरात तीव्र संताप व्यक्त केला जात आहे. (Top 10 News)

05) राम मंदिर देणगी प्रकरण सुप्रीम कोर्टात; मोदी सरकारसह योगी सरकारला नोटीस

अयोध्येतील राम जन्मभूमी मंदिराच्या देणगीत कथित गैरव्यवहार झाल्याच्या आरोपांवर सर्वोच्च न्यायालयाने केंद्र सरकार, उत्तर प्रदेश सरकार आणि श्री राम जन्मभूमी तीर्थ क्षेत्र ट्रस्टला नोटीस बजावलीय. न्यायालयाने उत्तर प्रदेश सरकारच्या विशेष तपास पथकाकडून (SIT) सविस्तर स्टेटस रिपोर्ट सादर करण्याचे आदेश दिले असून, SITची स्थापना कशी करण्यात आली याची माहितीही अहवालात देण्यास सांगितलेय. तसेच या प्रकरणातील सर्व सीसीटीव्ही फुटेज सुरक्षित ठेवण्याचे निर्देशही देण्यात आलेत. देणगी व्यवस्थापनात कथित आर्थिक गैरव्यवहार झाल्याचा आरोप करणाऱ्या जनहित याचिकांवर ही सुनावणी झाली. याचिकाकर्त्यांनी न्यायालयाच्या देखरेखीखाली स्वतंत्र चौकशीची मागणी केलीय. या प्रकरणाची पुढील सुनावणी येत्या सोमवारी होणार असून न्यायालयाच्या भूमिकेकडे देशाचे लक्ष लागलेय. (Top 10 News)

06) गुजरातमध्ये चांदीपुरा व्हायरसचा कहर; महिनाभरात 12 मुलांचा मृत्यू

गुजरातमध्ये चांदीपुरा व्हायरसच्या संसर्गामुळे गंभीर परिस्थिती निर्माण झालीय. गेल्या महिनाभरात 12 मुलांचा मृत्यू झाला असून, त्यापैकी तीन मुलांना चांदीपुरा व्हायरसची पुष्टी झालीय. उर्वरित मृत्यूंच्या अहवालाची प्रतीक्षा आहे. आतापर्यंत 27 संशयित नमुने तपासणीसाठी पाठवण्यात आले असून, सात मुलांचे अहवाल पॉझिटिव्ह आलेत. त्यापैकी चार मुलांवर उपचार सुरू आहेत. गांधीनगर, साबरकांठा, पंचमहाल, खेडा आणि अरवलीसह अनेक जिल्ह्यांमध्ये संसर्गाची प्रकरणे आढळली आहेत. या विषाणूवर अद्याप कोणतीही लस उपलब्ध नसल्याने आरोग्य विभागाने सर्वेक्षण, कीटकनाशक फवारणी आणि प्रतिबंधात्मक उपाय वाढवले आहेत. सँडफ्लाय या माशीमुळे हा विषाणू पसरत असल्याने नागरिकांनी स्वच्छता राखावी, अधिकृत सूचनांचे पालन करावे आणि अफवांवर विश्वास ठेवू नये, असे आवाहन प्रशासनाने केलेय. (Top 10 News)

07) इराण-अमेरिका संघर्ष तीव्र! हवाई हल्ल्यांनंतर तेहरानचा संताप

होर्मुझ सामुद्रधुनीतील व्यापारी जहाजांवरील हल्ल्यांनंतर अमेरिका आणि इराणमधील संघर्ष आणखी तीव्र झालाय. अमेरिकेने इराणच्या पाच प्रांतांवर हवाई हल्ले केल्यानंतर तेहरानने संतप्त प्रतिक्रिया देत या कारवाईला संयुक्त राष्ट्रांच्या सनदेचे आणि आंतरराष्ट्रीय कायद्याचे उल्लंघन म्हटलेय. इराणने अमेरिकेला मदत करणाऱ्या कोणत्याही देशालाही प्रत्युत्तर देण्याचा इशारा दिलाय. तसेच संयुक्त राष्ट्रांनी अमेरिकेला या हल्ल्यांसाठी जबाबदार धरावे, अशी मागणी केलीय. अमेरिकेचे अध्यक्ष डोनाल्ड ट्रम्प यांच्या वक्तव्यालाही इराणने फेटाळून लावले. दुसरीकडे अमेरिकेने या कारवाईचा उद्देश होर्मुझ सामुद्रधुनीतील व्यापारी जहाजांची सुरक्षा सुनिश्चित करणे आणि इराणची लष्करी क्षमता कमकुवत करणे असल्याचे स्पष्ट केलेय. या परिस्थितीमुळे मध्य पूर्वेतील तणाव आणखी वाढलाय. (Top 10 News)

08) Motorola Edge 70 Max 15 जुलैला होणार लॉन्च; AI फीचर्ससह बाजारात होणार एंट्री

मोटोरोलाने आपल्या बहुप्रतीक्षित Motorola Edge 70 Max स्मार्टफोनच्या लॉन्चची तारीख जाहीर केली असून हा फोन 15 जुलै 2026 रोजी दुपारी 12 वाजता सादर होणार आहे. या फ्लॅगशिप फोनमध्ये Qualcomm Snapdragon 8 Gen 5 प्रोसेसर, 12GB LPDDR5X RAM आणि 144Hz Quad HD+ LTPO डिस्प्ले देण्यात येणार आहे. 7000 निट्स पीक ब्राइटनेस आणि Corning Gorilla Glass 7i संरक्षणामुळे डिस्प्ले अधिक आकर्षक ठरणार आहे. गेमिंगसाठी BGMI 120fps सपोर्ट तसेच ऑन-डिव्हाइस AI फीचर्सही उपलब्ध असतील. फोन लाइट ब्लू आणि ग्रीन रंगांमध्ये येणार असून त्याला प्रीमियम डिझाइन देण्यात आले आहे. मात्र, किंमत आणि कॅमेऱ्याची अधिकृत माहिती लॉन्च इव्हेंटमध्येच जाहीर केली जाणार आहे. (Top 10 News)

09) गाडीच्या आत येऊ नका; पापाराझींवर सोनाक्षी सिन्हा संतापली, व्हिडिओ सोशल मीडियावर व्हायरल

बॉलिवूड अभिनेत्री सोनाक्षी सिन्हाचा पापाराझींवर नाराजी व्यक्त करतानाचा व्हिडिओ सध्या सोशल मीडियावर जोरदार व्हायरल होतोय. आकांक्षा कपूर आणि दिग्दर्शक शरण शर्मा यांच्या लग्नाच्या रिसेप्शनमधून बाहेर पडत असताना फोटोग्राफर्स तिच्या कारपर्यंत पोहोचल्याने सोनाक्षीचा संयम सुटला. “बास्स झालं, गाडीच्या आत येऊ नका… थँक्यू, बाय, गुड नाईट,” असे ती स्पष्टपणे म्हणताना दिसते. एवढ्यावरच न थांबता, “जोपर्यंत तुम्ही जाणार नाही, तोपर्यंत मी गाडीत बसणार नाही,” असेही तिने सुनावले. त्यानंतर पापाराझींनी मागे हटताच सोनाक्षी कारमध्ये बसली. हा व्हिडिओ सोशल मीडियावर मोठ्या प्रमाणात चर्चेत असून अनेकांनी अभिनेत्रीच्या खासगी आयुष्याचा आदर करण्याची गरज असल्याचे मत व्यक्त केलेय. (Top 10 News)

10)लॉर्ड्सवर तिरंगा फडकला! भारतीय महिला संघाचा इंग्लंडवर ऐतिहासिक विजय

क्रिकेटची पंढरी मानल्या जाणाऱ्या लंडनच्या ऐतिहासिक लॉर्ड्स मैदानावर भारतीय महिला क्रिकेट संघाने नवा इतिहास रचला आहे. भारत आणि इंग्लंड महिला संघादरम्यान खेळवल्या गेलेल्या एकमेव कसोटी सामन्यात भारताने यजमान इंग्लंडचा २७० धावांनी धुव्वा उडवला. या कसोटीत स्मृती मंधाना, कर्णधार हरमनप्रीत कौर, दीप्ती शर्मा, क्रांती गौड यांनी चमकदार कामगिरी केली. मात्र या सामन्यात यस्तिका भाटियाने सगळ्यांचे लक्ष वेधून घेतले. यास्तिकाने लॉर्ड्सच्या मैदानावर ऐतिहासिक शतक ठोकण्याचा पराक्रम केला. तिने १५८ चेंडूत ११३ धावांची खेळी केली आणि भारताचा विजय निश्चित केला. (Top 10 News)