Shravan Month – श्रावण सुरू झाल्‍यापासून पिंपरी-चिंचवडमध्ये भक्तीमय वातावरण निर्माण झाले आहे. मंदिरांमध्ये धार्मिक कार्यक्रमांची लगबग आहे. घराघरांत व्रत-वैकल्ये सुरू आहेत. त्यासोबतच पारायणे देखील सुरू आहेत. त्यामुळे शहरातील पुस्तक बाजारपेठेत धार्मिक ग्रंथांची मागणी वाढली आहे. ‘शिवलीलामृत’, ‘सोळा सोमवार’च्या पोथ्यांसह स्तोत्रे आणि संतचरित्रांच्या खरेदीसाठी भाविकांची गर्दी होत आहे.

पिंपरी, चिंचवड, भोसरी आणि निगडी परिसरातील पुस्तक विक्रेत्यांकडे सध्या धार्मिक साहित्याची विचारणा वाढली आहे. श्रावणातील नित्यवाचनासाठी विविध पोथ्या घेतल्या जात आहेत. पारंपरिक वाचनाची ही आवड अजूनही टिकून असल्याचे चित्र आहे. श्रावणात ‘शिवलीलामृत’च्या पारायणाला अनेक कुटुंबांमध्ये महत्त्व दिले जाते. त्यामुळे या ग्रंथाला विशेष मागणी आहे.

‘सोळा सोमवार’ व्रत कथा, श्रीमद्भगवद्गीता, मनाचे श्लोक, हरिविजय, गुरुचरित्र आणि व्यंकटेश स्तोत्र यांचीही विक्री वाढली आहे. चातुर्मासातील नित्यवाचनासाठी विविध ग्रंथ खरेदी केले जात आहेत. ज्ञानेश्वरी, गुरुचरित्र कथासार, नवनाथ भक्तिसार, श्रीस्वामी समर्थ सारामृत आणि दुर्गा सप्तशती यांनाही भाविकांकडून पसंती मिळत आहे.

श्रावणी सोमवारच्या व्रतकथा, मंगळागौरीची पूजा व गाणी आणि सत्यनारायण पूजा कथांची पुस्तके महिला वर्गाकडून मोठ्या प्रमाणावर घेतली जात आहेत. घरातील धार्मिक विधींसाठी आवश्यक माहिती एका ठिकाणी मिळत असल्याने या पुस्तकांना मागणी आहे. संतांच्या जीवनकार्याची माहिती देणाऱ्या चरित्र ग्रंथांनाही वाचक पसंती देत आहेत.

भक्तविजय, सार्थ अभंगगाथा तसेच संत तुकाराम, संत नामदेव, संत चोखामेळा, गोरा कुंभार आणि कान्होपात्रा यांच्या चरित्रांची खरेदी केली जात आहे. धार्मिक ग्रंथांच्या खरेदीत चाळीशीपुढील नागरिक आणि ज्येष्ठांचा सहभाग अधिक दिसत आहे. पारायणाची परंपरा पुढे नेण्याची जबाबदारी ज्येष्ठांकडे असल्याचे विक्रेत्यांचे निरीक्षण आहे.

कागद महागला; पुस्तकांच्या किमती वाढल्या
कागदाच्या वाढलेल्या दराचा परिणाम धार्मिक पुस्तकांवरही झाला आहे. यंदा काही पुस्तकांच्या किमतीत सुमारे पाच ते दहा रुपयांची वाढ झाली आहे. मात्र, या दरवाढीमुळे धार्मिक साहित्याच्या मागणीत फारशी घट झालेली नाही. ऑनलाइन माध्यमातून पुस्तके खरेदी करण्याचा पर्याय उपलब्ध आहे. तरीही अनेक भाविक प्रत्यक्ष दुकानात जाऊन पुस्तकांची निवड करतात. पूजा साहित्याबरोबर धार्मिक ग्रंथ घेण्याची परंपराही कायम आहे.