Monalisa Bhosale: २०२५ मधील प्रयागराज महाकुंभ मेळ्यात आपल्या निळसर-भुर्या डोळ्यांमुळे सोशल मीडियावर व्हायरल झालेली मोनालिसा भोसले पुन्हा एकदा चर्चेत आली आहे. मोनालिसाने ११ मार्च रोजी केरळमध्ये आपला प्रियकर फरमान खानसोबत विवाह केला. मात्र लग्नानंतर सोशल मीडियावर आणि काही ठिकाणी या विवाहावर ‘लव्ह जिहाद’चे आरोपही करण्यात आले. या सर्व चर्चांदरम्यान आता मोनालिसा आणि फरमान खान यांनी माध्यमांसमोर येत आपल्या नात्याबद्दल आणि प्रेमकथेेबद्दल स्पष्टपणे सांगितले आहे. माध्यमांशी बोलताना या जोडप्याने सांगितले की, त्यांची पहिली भेट एका चित्रपटाच्या शूटिंगदरम्यान झाली होती. कामाच्या निमित्ताने दोघांची ओळख झाली आणि हळूहळू मैत्री वाढत गेली. या मैत्रीचे रूपांतर पुढे प्रेमात झाले. दोघांनी जवळपास सहा महिने एकमेकांना डेट केले आणि त्यानंतर लग्न करण्याचा निर्णय घेतला. फरमान खानने या नात्याबद्दल बोलताना एक खास गोष्ट सांगितली. त्याने सांगितले की, सुरुवातीला मोनालिसाने त्याला लग्नासाठी प्रपोज केले होते. मात्र त्या वेळी त्याने हा प्रस्ताव नाकारला होता. त्यावेळी त्याला या नात्याबद्दल थोडी शंका होती. पण नंतर मोनालिसाच्या आग्रहामुळे आणि दोघांमधील वाढत्या जवळीकीमुळे त्याने हा प्रस्ताव स्वीकारला. फरमान म्हणाला, “आम्ही सहा महिने एकमेकांना डेट केले. पण ते सहा महिने आम्हाला जणू साठ वर्षांच्या प्रेमासारखे वाटले. त्या काळात आम्ही एकमेकांना खूप चांगल्या प्रकारे समजून घेतले. त्यामुळे आम्ही लग्न करण्याचा निर्णय घेतला.” Monalisa And Farman Khan या जोडप्याने केरळमध्ये लग्न करण्यामागचे कारणही सांगितले. फरमानने सांगितले की, त्यांना केरळमधील नयनार मंदिराची जागा खूप आवडली. तसेच केरळमधील लोक खूप चांगले आणि सहकार्य करणारे असल्याचेही त्याने नमूद केले. मोनालिसानेही केरळमधील लोकांनी लग्नासाठी खूप मदत केल्याचे सांगितले. दरम्यान, या लग्नानंतर काही जणांनी या विवाहाला ‘लव्ह जिहाद’चा रंग देण्याचा प्रयत्न केला. मोनालिसाला चित्रपटाची ऑफर देणारे दिग्दर्शक सनोज मिश्रा यांनीही या प्रकरणावर टीका केली होती. मात्र मोनालिसा आणि फरमान या दोघांनीही हे सर्व आरोप फेटाळून लावले आहेत. त्यांनी स्पष्टपणे सांगितले की, त्यांचे लग्न हे दोघांच्या संमतीने झाले असून त्यात कोणत्याही प्रकारचा दबाव किंवा कटकारस्थान नाही. मोनालिसा भोसले २०२५ मध्ये प्रयागराज येथे महाकुंभ मेळ्यात रुद्राक्ष आणि माळा विकताना दिसली होती. तिच्या अनोख्या निळसर-भुर्या डोळ्यांमुळे ती सोशल मीडियावर मोठ्या प्रमाणावर व्हायरल झाली. त्यानंतर तिच्याबद्दल मोठी चर्चा सुरू झाली आणि तिला चित्रपट क्षेत्रातूनही ऑफर मिळाल्या. आता फरमान खानसोबत केलेल्या लग्नामुळे मोनालिसा पुन्हा चर्चेत आली आहे. मात्र या सर्व वादांदरम्यान या जोडप्याने आपल्या प्रेमावर विश्वास ठेवत एकत्र आयुष्य सुरू करण्याचा निर्णय घेतला आहे.
