Rashmika mandanna – Vijay deverakonda – दाक्षिणात्य चित्रपटसृष्टीतील सुपरहिट जोडी अभिनेता विजय देवरकोंडा आणि अभिनेत्री रश्मिका मंदाना यांची प्रेमकहाणी सध्या चाहत्यांमध्ये चर्चेचा विषय ठरली आहे. मैत्रीतून सुरू झालेलं हे नातं अनेक वर्षे खासगी ठेवत दोघांनी आपल्या करिअरवर लक्ष केंद्रित केलं. मात्र अधूनमधून समोर आलेले संकेत, सुट्ट्यांतील समान लोकेशनचे फोटो आणि सार्वजनिक कार्यक्रमांतील खास क्षण यामुळे त्यांच्या नात्याची चाहूल चाहत्यांना लागतच राहिली. आता दोघांनी आपल्या लग्नाला ‘द वेडिंग ऑफ वीरोश’ असं नाव देत आयुष्याची नवी सुरुवात जाहीर केल्याची चर्चा रंगत असून, त्यांच्या प्रेमकथेची पुन्हा एकदा जोरदार चर्चा सुरू झाली आहे. पहिली भेट आणि ऑन-स्क्रीन केमिस्ट्री : विजय आणि रश्मिका यांची पहिली भेट २०१८ मध्ये ‘Geetha Govindam’ या चित्रपटाच्या शूटिंगदरम्यान झाली. या चित्रपटातील त्यांच्या गोड आणि नैसर्गिक केमिस्ट्रीने प्रेक्षकांची मनं जिंकली. चित्रपट बॉक्स ऑफिसवर यशस्वी ठरला आणि त्यानंतर दोघांच्या डेटिंगच्या चर्चांना उधाण आलं. ‘डिअर कॉम्रेड’मुळे वाढली जवळीक : त्यानंतर २०१९ मध्ये दोघे पुन्हा ‘Dear Comrade’ मध्ये एकत्र दिसले. हा तीव्र भावनिक प्रेमकथा असलेला चित्रपट होता. या काळात त्यांची मैत्री अधिक घट्ट झाल्याचं बोललं जातं. वैयक्तिक आयुष्यातील कठीण टप्प्यात विजय रश्मिकासाठी मोठा आधार ठरल्याच्या चर्चा त्यावेळी रंगल्या. सुट्ट्यांचे फोटो आणि व्हायरल क्षण : २०२० ते २०२२ दरम्यान दोघे अनेकदा विमानतळावर किंवा खासगी कार्यक्रमांत एकत्र दिसले. मालदीव आणि रोमसारख्या ठिकाणांवरील सुट्ट्यांच्या फोटोंमधील एकसारखी पार्श्वभूमी पाहून सोशल मीडियावर त्यांच्या नात्याबाबत चर्चा रंगल्या. साखरपुड्याच्या चर्चा : २०२५ मध्ये हैदराबादमध्ये विजयच्या घरी खासगी समारंभात दोघांनी साखरपुडा केल्याची चर्चा समोर आली. अधिकृत घोषणा नसली तरी सार्वजनिक कार्यक्रमांत दिसलेल्या एंगेजमेंट रिंगमुळे या चर्चांना आणखी बळ मिळालं. ‘वी-रोश’ची प्रेमकथा : चाहत्यांनी विजय (वी) आणि रश्मिका (रोश) यांच्या नावांची जोड देत त्यांना ‘वीरोश’ असं टोपणनाव दिलं आहे. त्यांच्या नात्याबाबत अधिकृत घोषणा मर्यादित असली तरी दोघांच्या मैत्री, परस्पर आदर आणि पाठिंब्यामुळे ही जोडी चाहत्यांसाठी विशेष ठरली आहे. त्यांची ही प्रेमकथा पडद्यावर सुरू झाली आणि आता ती आयुष्यातील नव्या टप्प्यावर पोहोचत असल्याच्या चर्चेमुळे चाहत्यांमध्ये उत्सुकता शिगेला पोहोचली आहे.
