Sanjay Raut: गृहमंत्री अमित शाह यांच्याबाबत शिवसेना ठाकरे गटाचे खासदार संजय राऊत यांनी मोठा दावा केला आहे. अमित शाह यांना तात्काळ उपपंतप्रधान व्हायचं आहे. पण मोदींनी त्यांना उपपंतप्रधान करण्यास नकार दिला आहे, असा दावा ठाकरे गटाचे खासदार संजय राऊत यांनी केला आहे.

संजय राऊत यांनी अमित शाह यांच्या संसदेतील अनुपस्थितीवरुन बोलताना म्हटले की, “अमित शाह यांना संसदेत येण्यापासून कोणी रोखले आहे? मुळात अमित शाह आणि नरेंद्र मोदी यांच्यामध्ये मतभेद आहेत. अमित शाह यांना तातडीने उपपंतप्रधान व्हायचे आहे. अमित शाह यांनी मागणी केली आहे की, मला तुमचे वारसदार म्हणून, देशाचे उपपंतप्रधान म्हणून घोषित करा आणि मोदींनी त्याला नकार दिला आहे,” असा मोठा दावा त्यांनी केला आहे.

संसदेच्या कामकाजावर बोलताना संजय राऊत म्हणाले की, “सर्वच खासदारांनी सभागृहाची प्रतिष्ठा ठेवायला हवी. भाजप हा शिस्त आणि नितिमत्तेचा टेंभा मिरवणारा पक्ष आहे असे ते सांगतात, त्यामुळे शिस्त त्यांनीही पाळायला हवी. चर्चेपासून कोणीही पळत नाही, अमित शाह यांची पळापळ सुरू आहे,” असे त्यांनी म्हटले.

‘अमित शाह यांच्या दबावाखाली निवडणूक आयोग काम करतं’

शिवसेना पक्ष आणि चिन्हाच्या सुनावणीवर बोलताना संजय राऊत यांनी निवडणूक आयोगाच्या भूमिकेवर प्रश्न उपस्थित केले. “अमित शाह यांच्या दबावाखाली निवडणूक आयोग काम करते. आधी उद्धव साहेबांचा, मग शरद पवारांचा आणि मग तृणमूल काँग्रेसचा पक्ष, यांच्यासोबतही हेच झाले. सेटिंगमध्ये चार पक्ष विकले गेले, या सगळ्यामध्ये 5000 कोटींचा बाजार झाला आहे,” असाही आरोप  राऊत यांनी केला.

पुढे ते म्हणाले, “वरिष्ठ वकील कपिल सिब्बल यांनी केलेला युक्तिवाद अत्यंत महत्त्वाचा आहे. उद्या कोणीही येईल आणि विधिमंडळ पक्षाचा गट विकत घेईल, त्यामुळे संविधान धोक्यात येईल. कपिल सिब्बलांचा युक्तिवाद ऐकून न्यायालयही विचारात पडले आहे. आम्ही ठामपणे सांगतो, संविधानाचा विजय होईल आणि आमच्याच बाजूने निर्णय लागेल,” असा विश्वास त्यांनी व्यक्त केला.

हेही वाचा: 

Shakeela : मोबाईलच्या अतिवापराची मोठी किंमत! अभिनेत्रीच्या मानेची शस्त्रक्रिया; नसांवर झाला गंभीर परिणाम