Pune Court : गणेशखिंड रस्त्यावरील शासकीय तंत्रनिकेतन पुणे येथे बेकायदा जमाव जमवून प्राचार्यांच्या कार्यालयातील पंतप्रधान नरेंद्र मोदी यांचे छायाचित्र हटविल्याप्रकरणी अटक करण्यात आलेल्या महाराष्ट्र नवनिर्माण सेनेच्या तीन कार्यकर्त्यांना पुणे न्यायालयाने जामीन मंजूर केला.

प्रशांत दुर्गाप्रसाद कनोजिया, विक्रांत वसंत भिलारे आणि आशिष भालचंद्र साबळे या तिघा कार्यकर्त्यांना प्रत्येकी पन्नास हजार रुपयांच्या जातमुचलका आणि तितक्याच रकमेच्या हमीवर जामीन मंजूर करण्यात आला.

या प्रकरणी महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांच्यासह वीस ते पंचवीस कार्यकर्त्यांविरोधात चतुःश्रृंगी पोलिस ठाण्यात गुन्हा दाखल करण्यात आला आहे. या प्रकरणी महाविद्यालयाचे प्राचार्य डॉ. राजेंद्र काशिराम पाटील (वय ५२, रा. डावी भुसारी कॉलनी, कोथरूड) यांनी तक्रार दिली आहे.

ही घटना ३१ ऑगस्ट रोजी दुपारी साडेबारा ते सव्वा दरम्यान घडली. या गुन्ह्यात पोलिसांनी तिघा कार्यकर्त्यांना अटक केली. या गुन्ह्यात तिघांनी जामीन मिळण्यासाठी अॅड. अमेय बलकवडे, अॅड. विजयसिंह ठोंबरे, अॅड. सिद्धांत मालेगावकर, अॅड. चैतन्य दीक्षित व अॅड. वैभव हटकर यांच्यामार्फत न्यायालयात अर्ज केला.

या खटल्याच्या निकालासाठी लागणारा वेळ लक्षात घेत न्यायालयाने तिघांना जामीन मंजूर केला. आरोपपत्र दाखल होईपर्यंत तपासात सहकार्य करावे, खटल्याशी संबंधित पुराव्यांमध्ये छेडछाड करू नये, आदी अटी न्यायालयाने घातल्या आहेत.