MLC Election : पुणे स्थानिक स्वराज्य संस्था मतदारसंघाच्या विधान परिषद निवडणुकीत राजकीय हालचालींना वेग आला असून उमेदवारी अर्ज खरेदी करणाऱ्या इच्छुकांच्या यादीमुळे नवे तर्क-वितर्क सुरू झाले आहेत. विशेष म्हणजे राष्ट्रवादी काँग्रेसकडून चर्चेत नसलेल्या दोन नेत्यांनी अर्ज घेतल्याने सुनेत्रा पवार कोणता राजकीय डाव टाकणार याबाबत उत्सुकता वाढली आहे. (MLC Election)

महायुतीमध्ये पुण्याची जागा राष्ट्रवादी काँग्रेसकडे जाण्याची शक्यता जवळपास निश्चित मानली जात असताना पिंपरी-चिंचवडमधील माजी नगरसेवक संदीप वाघेरे आणि राजेंद्र जासूद यांनी उमेदवारी अर्ज घेतले आहेत. त्यामुळे पक्षाकडून त्यांना ग्रीन सिग्नल मिळाला आहे की केवळ तयारी म्हणून अर्ज घेण्यात आले आहेत, याबाबत अद्याप स्पष्टता नाही. मात्र उमेदवारी अर्ज भरण्याची मुदत जवळ आल्याने या हालचालींनी राजकीय चर्चांना उधाण आले आहे. (MLC Election)

दुसरीकडे महाविकास आघाडीत ही जागा राष्ट्रवादी काँग्रेस (शरदचंद्र पवार गट) यांच्याकडे गेली असून पक्षाकडून पुणे शहराध्यक्ष श्रीकांत पाटील यांचे नाव आघाडीवर मानले जात आहे. त्यामुळे पुण्यात पुन्हा एकदा राष्ट्रवादी विरुद्ध राष्ट्रवादी असा थेट सामना पाहायला मिळण्याची शक्यता निर्माण झाली आहे. (MLC Election)

भाजपकडूनही काही नेत्यांनी तयारी सुरू केली आहे. गणेश बिडकर आणि प्रदीप कंद यांनी उमेदवारी अर्ज घेतल्याने शेवटच्या क्षणी काही राजकीय समीकरणे बदलतात का, याकडे लक्ष लागले आहे. (MLC Election)

तर शिवसेना (शिंदे गट) कडून महेश शेवकरी आणि सुवर्णा राक्षे यांनी अर्ज घेतले आहेत. काँग्रेसचे गोपाळ तिवारी यांनीही उमेदवारी अर्ज उचलला आहे.

विशेष म्हणजे उमेदवारीसाठी चर्चेत असलेल्या काही प्रमुख नावांनी अद्याप अर्ज घेतले नसल्याची माहिती समोर आली आहे. त्यामुळे पक्षांकडून एबी फॉर्म कोणाला दिला जाणार आणि कोणाचे नाव अंतिम क्षणी पुढे येणार, याबाबत सस्पेन्स कायम आहे. (MLC Election)

पुणे स्थानिक स्वराज्य संस्था मतदारसंघात एकूण ८६७ मतदार असून त्यापैकी ७०० हून अधिक मतदार महायुतीच्या बाजूने असल्याचे गणित आहे. तर महाविकास आघाडीकडे तुलनेने कमी संख्याबळ आहे. मात्र स्थानिक राजकारणातील समीकरणे आणि अंतर्गत रणनीतीमुळे ही निवडणूक चुरशीची ठरण्याची शक्यता व्यक्त केली जात आहे. (MLC Election)

उमेदवारी अर्ज घेणाऱ्या प्रमुख नेत्यांची यादी

राष्ट्रवादी काँग्रेस : संदीप वाघेरे, राजेंद्र जासूद
शिवसेना (शिंदे गट) : महेश शेवकरी, सुवर्णा राक्षे
काँग्रेस : गोपाळ तिवारी
राष्ट्रवादी काँग्रेस (शरद पवार गट) : श्रीकांत पाटील, तुषार कामठे

आता महायुती आणि महाविकास आघाडी कोणत्या उमेदवारांवर अंतिम शिक्कामोर्तब करतात, याकडे पुण्यासह राज्याच्या राजकीय वर्तुळाचे लक्ष लागले आहे. (MLC Election)