Mitchell Santner and Shreyas Iyer on Vaibhav Sooryavanshi Ahead of IND vs NZ T20I Series : भारत आणि न्यूझीलंड यांच्यातील पाच सामन्यांच्या टी-२० मालिकेला गुरुवारपासून क्राइस्टचर्च येथे सुरुवात होत आहे. या मालिकेच्या पूर्वसंध्येला किवी संघाचा कर्णधार मिचेल सँटनरने भारतीय युवा फलंदाज वैभव सूर्यवंशी याच्या स्फोटक फलंदाजीची धास्ती व्यक्त केली आहे. जर सूर्यवंशीला भारताच्या प्लेइंग इलेव्हनमध्ये संधी मिळाली, तर त्याला रोखणे गोलंदाजांसाठी मोठे आव्हान ठरेल, असे मान्य करत सँटनरने त्याच्यासाठी खास रणनीती आखल्याचा खुलासा केला आहे.

वैभवची फलंदाजी धोकादायक; किवींची विशेष तयारी

पहिल्या सामन्याच्या पूर्वसंध्येला पत्रकारांशी बोलताना मिचेल सँटनर म्हणाला की, “वैभव वेस्ट इंडिजविरुद्धच्या मालिकेत खेळला नव्हता; मात्र आयपीएलमध्ये आम्ही सर्वांनी पाहिले आहे की तो किती प्रतिभावान खेळाडू आहे. अभिषेक शर्मासह इतर फलंदाज फॉर्ममध्ये आहेतच, पण जर वैभवला खेळण्याची संधी मिळाली, तर तो काय करू शकतो याची आम्हाला पूर्ण कल्पना आहे. त्याला रोखणे गोलंदाजांसाठी कठीण ठरते. आयपीएलमधील त्याची आक्रमक खेळी पाहून आम्ही त्याच्यासाठी विशेष रणनीती आखली आहे.”

भुवनेश्वर कुमारचे पुनरागमन किवींसाठी मोठे आव्हान –

New Zealand are prepared for Vaibhav Sooryavanshi if he gets a game, says Mitchell Santner 👁️‍🗨️ https://t.co/spTGCcfVyw

— Cricinfo (@cricinfo) October 21, 2026

चार वर्षांनंतर भारतीय टी-२० संघात पुनरागमन करणाऱ्या भुवनेश्वर कुमारबाबत बोलताना सँटनरने त्याला न्यूझीलंडमधील परिस्थिती मानवेल असा अंदाज वर्तवला. तो म्हणाला की, “न्यूझीलंडमधील खेळपट्ट्यांवरून चेंडूला थोडी जरी मदत मिळाली, तरी भुवी त्याचा अचूक फायदा उठवू शकतो. भारतातील सपाट खेळपट्ट्यांवरही त्याने अप्रतिम स्विंग मिळवला होता. त्यामुळे येथे भुवीच्या स्विंगचा सामना करणे आमच्या फलंदाजांसाठी निश्चितच मोठे आव्हान असेल.”

अभिषेक आणि संजू फॉर्ममध्ये; वैभवला थेट संधी नाही: श्रेयस अय्यर –

🚨Mitchell Santner Press Conference: “Bhuvi will love these conditions” – IND vs NZ

@CricSubhayan #Pressconference @BLACKCAPS #NZvIND https://t.co/aUjMAU0wTQ

— RevSportz Global (@RevSportzGlobal) October 21, 2026

दुसऱ्या बाजूला भारतीय टी-२० संघाचा कर्णधार श्रेयस अय्यर याने स्पष्ट केले की, वैभवला लगेच प्लेइंग इलेव्हनमध्ये स्थान मिळणे कठीण आहे. अय्यर म्हणाला की, “वैभवसारखा युवा आणि प्रतिभावान खेळाडू संघात असणे आनंदाची बाब आहे. मात्र तो खूप तरुण आहे आणि त्याला पुढे भरपूर संधी मिळतील. अभिषेक शर्मा आणि संजू सॅमसन हे सलामीवीर सातत्याने उत्कृष्ट कामगिरी करत आहेत आणि त्यांनी विश्वचषकही जिंकवला आहे. त्यामुळे वैभवला थेट प्लेइंग इलेव्हनमध्ये स्थान मिळणार नाही, पण योग्य वेळ आल्यावर त्याला नक्की संधी दिली जाईल.”

हेही वाचा – Virat Rohit WC 2027 : रोहित अन् विराट २०२७ चा वर्ल्डकप खेळणार की नाही? BCCI अध्यक्षांनी थेट सांगून टाकली ‘ती’ एक महत्त्वाची अट!

परदेशी दौऱ्यांचा अनुभव भविष्यासाठी महत्त्वाचा –

श्रेयसने पुढे सांगितले की, एवढ्या लहान वयात परदेशी दौऱ्यांचा आणि तेथील वातावरणाचा अनुभव घेणे वैभवच्या भविष्यातील तयारीसाठी अत्यंत उपयुक्त ठरेल. पहिल्या सामन्यासाठी दोन्ही संघ सज्ज झाले असून, क्राइस्टचर्चची खेळपट्टी गोलंदाजांना मदत करेल की फलंदाजांना, यावर पहिल्या लढतीचे पारडे अवलंबून असणार आहे.